اسلام آباد۔6نومبر (اے پی پی):پاکستان ریلویز نے منصفانہ اور شفاف بولی کے عمل کے ذریعے پبلک پرائیویٹ پارٹنرشپ کے تحت 14 ٹرینوں کے کمرشل انتظام و انصرام کو نجی پارٹیز کے حوالے کر دیا گیا ہے۔
وزارت ریلویز کے ایک اہلکار نے اتوار کو’’اے پی پی ‘‘کو بتایا کہ ٹرینوں کو آئوٹ سورس کرنے کا بنیادی مقصد مسافروں کو بہتر سہولیات فراہم کرنا اور محکمہ کے لیے زیادہ آمدنی پیدا کرنا ہے۔ پاکستان ریلوے نے جن ٹرینوں کی نجکاری کی ہے ان میں مہر ایکسپریس، فرید ایکسپریس، فیض احمد فیض، مہران ایکسپریس، سرسید ایکسپریس، بدر ایکسپریس، غوری ایکسپریس، میانوالی ایکسپریس، موہنجوداڑو، تھل ایکسپریس، تیزگام ایکسپریس، سبک خرم، راول ایکسپریس اور راوی ایکسپریس شامل ہیں۔
انہوں نے کہا کہ ٹرینوں کو پبلک پروکیورمنٹ ریگولیٹری اتھارٹی (پیپرا) رولز کے تحت ٹینڈرنگ کے شفاف طریقہ کار کے ذریعے اخبارات میں اشتہار کے ذریعے نجی شعبہ کو سونپا گیا ہے۔
انہوں نے کہا کہ پاکستان ریلویز کی آمدن سے زائد بولیاں ملنے والی ٹرینوں کو آئوٹ سورس کیا گیا ہے۔انہوں نے کہا کہ ٹرینوں کو پاکستان ریلوے کی آمدنی میں اضافہ اور نقصانات کو کم کرنے، صفائی ستھرائی کو بہتر بنانے اور مسافروں کو کھانے کی بہتر سہولیات فراہم کرنے کے مقصد سے آئوٹ سورس کیا گیا ہے
