لاہور۔9 مارچ(اے پی پی )پاکستان ریلویز کو ترکی ، ایران ، افغانستان اور روس کے ساتھ ملانے جا رہے ہیں،ترکی اور ایران نے بھی پاکستان ریلوے کو تعاون کی یقین دہانی کروائی ہے۔آئندہ بجٹ میں پاکستان ریلویز کے تمام ملازمین کا ایک گریڈ بڑھانے کی کوشش کروں گا۔ ان خیالات کا اظہار وفاقی وزیر ریلوے شیخ رشید احمد نے ریلوے ورکشاپ مغلپورہ میں نئی چلنے والی نان سٹاپ ٹرین جناح ایکسپریس کے ریک کے معائنے کے بعد مزدوروں سے خطاب کرتے ہوئے کیا۔ انہوں نے کہا کہ جناح ایکسپریس کا کرایہ 7ہزارروپے رکھا ہے لیکن ریلوے انتظامیہ جتنی مرضی مخالفت کرے سر سید ایکسپریس کا کرایہ 10ہزارروپے رکھوں گا کیونکہ لوگ اچھی سروس کے ساتھ کرایہ بھی خرچ کرنا چاہتے ہیں۔ وزیر ریلوے نے کہا کہ ریلوے واحد ادارہ ہے جس میں 10ہزار نوکریاں نکالی گئی ہیں ، ریلوے مزدورں کو ماضی میں کسی نے ترقی نہیں دی، میں نے کہہ دیا ہے کہ اگر کسی افسر نے میرٹ سے ہٹ کر بھرتی کی تو نہیں چھوڑوں گااور بھرتیوں میں ٹی ایل اے ملازمین کو بھی حصہ ملے گا۔ انہوں نے مزید کہا کہ ماضی میں فضول اسٹیشنوں پر 2ارب روپے خرچ کیے گئے جہاں سے ریلوے کو پانچ ہزار آمدن بھی نہیں ہوتی، اصل ضرورت لاہور، کراچی اور بڑے اسٹیشنوں کو اپ گریڈ کرنے کی ہے، لاہور پاکستان ریلوے کی جان ہے اس کو مثالی ریلوے اسٹیشن بنایا جائے گا۔ انہوں نے کہا کہ ملک کو کرپشن نے تباہ کیا ہے وزیر اعظم کی قیادت میں ریلوے کو کرپشن سے پاک کریں گے، ٹی ایل اے ملازمین کو کچھ اس بجٹ میں اور باقی ماندہ کو اگلے بجٹ میں مستقل کریں گے، آنے والا دور ریلوے کیلئے سنہری دور ہوگا۔ اس موقع پر چیئرمین ریلویز سلطان سکندر راجہ ، چیف ایگزیکٹو آفیسر محمد آفتاب اکبراور ریلوے کے دیگر اعلیٰ افسران بھی موجود تھے۔
