اسلام آباد۔11مئی (اے پی پی):پاکستان سمیت دنیا بھر میں ماں سے محبت کے اظہارِ کا عالمی دن اتوار 11 مئی کو منایا گیا، اس دن کے منانے کا مقصد ماؤں کی عظمت کا اعتراف اور انہیں خراج تحسین پیش کرنا ہے۔دنیا کے اکثر ممالک میں ماؤں کا عالمی دن مئی کے دوسرے اتوار کو منایا جاتا ہے تاہم کئی ممالک میں جو یہ دن جنوری، مارچ، اکتوبر یا نومبر میں منایا جاتا ہے۔ یہ دن ماں کے مقدس ترین رشتے کی عظمت و اہمیت کو اُجاگر کرنے اور ماں کیلئے احترام اور محبت کے جذبات کو فروغ دینے کیلئے منایا جاتا ہے۔
واضح رہے کہ ماؤں کا عالمی دن منانے کی تاریخ بہت قدیم ہے اور اس کا سب سے پہلے یونانی تہذیب میں سراغ ملتا ہے جہاں تمام دیوتاؤں کی ماں ”گرہیا دیوی“ کے اعزاز میں یہ دن منایا جاتا تھا، 16ویں صدی میں ایسٹر سے 40 روز پہلے انگلستان میں ایک دن ”مدرنگ سنڈے“ کے نام سے موسوم تھا جبکہ امریکہ میں مدرز ڈے کا آغاز 1872ء میں ہوا۔
1907ء میں فلاڈیفیا کی اینا جاروس نے اسے قومی دن کے طور پر منانے کی تحریک چلائی جو بالآخر کامیاب ہوئی اور 1911ء میں امریکہ کی ایک ریاست میں یہ دن منایا گیا۔ان کوششوں کے نتیجے میں 8 مئی 1914 ء کو امریکا کے صدر ووڈرو ولسن نے مئی کے دوسرے اتوار کو سرکاری طورپر ماؤں کا دن قرار دیا،
اب دنیا بھر میں ہر سال مئی کے دوسرے اتوار کو یہ دن منایا جاتا ہے۔ماؤں کے عالمی دن کے موقع پر ہمیں یہ یادرکھنا چاہئے کہ والدین ایک سائے کی طرح ہیں جن کی ٹھنڈک کا احساس ہمیں اس وقت تک نہیں ہوتا جب تک یہ سایہ سر پر موجود رہتا ہے، جونہی یہ سایہ اُٹھ جاتا ہے تب پتہ چلتا ہے کہ ہم کیا کھو بیٹھے ہیں۔ ماں سے محبت کےاظہار کے عالمی دن کے موقع پر ملک بھر میں مختلف تقریبات کا انعقاد کیا گیا۔
Short Link: https://urdu.app.com.pk/urdu/?p=595599
