کراچی ۔ 9 مئی (اے پی پی) پاکستان اسٹاک ایکسچینج (پی ایس ایکس) میں تیزی کا تسلسل برقرار رہا، کے ایس ای 100 انڈیکس مزید 137.23 پوائنٹس کے اضافے سے تاریخ کی نئی بلند ترین سطح 51073.14 پوائنٹس پر بند ہوا، مارکیٹ سرمایہ میں25 ارب 20 کروڑ 32 لاکھ 17 ہزار 662 روپے کا اضافہ ہوا جبکہ تجارتی حجم میں بھی 1 ارب 33 کروڑ 61 لاکھ 82 ہزار 344 روپے کی تیزی رونماءہوئی۔ اسی طرح خرید و فروخت میں 4 کروڑ 41 لاکھ 6 ہزار 170 حصص کا اضافہ ہوگیا۔ تفصیلات کے مطابق کاروباری ہفتے کے دوسرے روز منگل کو بھی پی ایس ایکس میں تیزی کا رجحان برقرار رہا اور 100 انڈیکس 51000 پوائنٹس کی بالائی نفسیاتی حد عبور کرتا ہوا مزید 137.23 پوائنٹس کے اضافے سے تاریخ کی نئی بلند ترین سطح 51073.14 پوائنٹس پر بند ہوا جبکہ انڈیکس میں پیر کو بھی 1084.78 پوائنٹس کی تیزی رونماءہوئی تھی۔ مزیدبرآں منگل کو مارکیٹ میں اتار چڑھاﺅ کے بعد کے ایس ای 30 انڈیکس 10.49 پوائنٹس کے اضافے سے 27158.16 پوائنٹس پر بند ہوا، کے ایس سی آل شیئر انڈیکس میں 116.81 پوائنٹس کی تیزی رہی جبکہ کے ایم آئی 30 انڈیکس میں 322.25 پوائنٹس کا اضافہ ریکارڈ کیا گیا تاہم بینکس ٹریڈ ایبل (بی اے ٹی آئی) انڈیکس 22.42 پوائنٹس کی کمی سے 21871.66 پوائنٹس پر بند ہوا۔
