اسلام آباد ۔ 14 اپریل (اے پی پی)حکومت کی طرف سے اچھے اسلوب حکمرانی کو یقینی بنانے ، عوامی شکایات کے فوری ازالے اور سرکاری شعبہ کے محکموں میں روابط کے فروغ کے لئے جاری کردہ پاکستان سٹیزن پورٹل پر 80 ہزار 753 تارکین وطن پاکستانیوں نے خود کو رجسٹرڈ کرایا ہے۔ وزیر اعظم پرفارمنس ڈلیوری یونٹ(پی ایم ڈی یو)کے سرکاری ذرائع کے مطابق پاکستان سیٹیزن پورٹل پر 8 لاکھ 75 ہزار 111 افراد رجسٹرڈ ہوئے ہیں جن میں سے 7 لاکھ 91 ہزار 59 ملک میں مقیم پاکستانی ہیں‘ پاکستان سیٹیزن پورٹل پر اب تک 6 لاکھ 4 ہزار 47 شکایات موصول ہوئیں جن میں سے 5 لاکھ 53 ہزار 953 شکایات پاکستان میں مقیم شہریوں نے درج کرائی ہیں۔ جبکہ 47 ہزار 729 شکایات تارکین وطن پاکستانیوں نے درج کرائی ہیں جبکہ 2 ہزار 392 شکایات غیر ملکیوں کی بھی موصول ہوئی ہیں۔ حل کی گئی شکایات کی تفصیلات بتاتے ہوئے ذرائع نے کہا کہ تقریبا 4 لاکھ 49 ہزار 25 شکایات کا ازالہ کیا جا چکا ہے۔پنجاب میں 43.87 فیصد شکایات کا ازالہ کیا گیا جو شکایات ازالے کی بلند ترین شرح ہے۔ ذرائع نے بتایا کہ وزیر اعظم نے عوامی شکایات کو ترجیحی بنیادوں پر حل کرنے اورغیر ملکیوں کی شکایات بھی ملکی قوانین کے مطابق حل کرنے کی واضح ہدایات جاری کر رکھی ہیں جس پر عمل کیا جارہا ہے۔
