مدینہ منورہ۔23مئی (اے پی پی):پاکستان کے مختلف شہروں سے آج ( منگل کو) مجموعی طور پر 9 پروازیں 3ہزارسے زائد عازمین حج کو مدینہ منورہ پہنچائیں گی۔دستیاب معلومات کے مطابق روڈ ٹو مکہ منصوبہ اسلام آباد سے چار پروازوں کی آمد میں سہولت فراہم کرے گا جبکہ سیالکوٹ، کراچی اور ملتان سے مزید پانچ پروازیں آنے والی ہیں۔’’اے پی پی ‘‘کے ساتھ بات چیت میں مدینہ منورہ میں ملکی حج مشن نے اس بات کی تصدیق کی کہ عازمین حج کی آمدورفت، رہائش اور کھانے کے لیے تمام ضروری تیاریاں کر لی گئی ہیں۔
وفاقی وزیر برائے مذہبی امور سینیٹر طلحہ محمود کی خصوصی ہدایت پر حج معاونین اور پاکستان میڈیکل مشن عازمین حج کو مسلسل مدد اور تعاون فراہم کرنے کے لئے 24 گھنٹے لگن کے ساتھ کام کر رہے ہیں۔وفاقی وزیر نے بار بار عملے کو تنبیہ کی کہ وہ حجاج کی خدمت میں کسی قسم کی غفلت نہ برتیں۔انہوں نے عازمین حج سے کہاکہ وہ اپنے سفر کے دوران تحمل اور برداشت کا مظاہرہ کریں اور سعودی عرب میں قیام کریں، پاکستان کے نمائندے کی حیثیت سے انہیں مثالی نظم و ضبط کا مظاہرہ کرنا چاہئے۔
واضح رہے کہ 2019 کے بعد ہونے والے اس سال حج میں ملک کے تمام خطوں سے تقریباً 180,000 پاکستانی عازمین شرکت کریں گے،مسجد نبویﷺ میں جاری توسیعی کام کی وجہ سے رہائش سے متعلق چیلنجوں کے باوجود پاکستانی حکام پوری تندہی سے اس بات کو یقینی بنانے کے لئے کام کر رہے ہیں کہ عازمین حج کو بہترین دستیاب قریبی ہوٹل میں فراہم کئے جائیں۔
