لاڑکانہ۔ 10 جون (اے پی پی):پاکستان کے سفارتی منظر نامے میں نمایاں بہتری آ رہی ہے، جس کی نشاندہی روس کے ساتھ تعلقات میں فروغ اور عالمی برادری کی جانب سے پہلگام واقعے کے حوالے سے دعوئوں کو ثابت کرنے میں بھارت کی ناکامی ہے۔ اس بات کا اظہار ماسکو میں تعینات پاکستان کے سفیر محمد خالد جمالی نے عید کے موقع پر اپنے آبائی شہر کوٹ نور پور میں سرکاری خبر رساں ادارے ایسوسی ایٹڈ پریس آف پاکستان (اے پی پی) کو دیے گئے ایک انٹرویو میں کیا۔سفیر محمد خالد جمالی نے پاکستان اور روس کے درمیان فروغ پزیر تعلقات پر روشنی ڈالی، تجارت، سفارتی اور ثقافتی تبادلوں میں ترقی کی رفتار پر زور دیا۔ یہ توسیع پذیر شراکت داری اپنے بین الاقوامی اتحاد کو متنوع بنانے اور باہمی فائدہ مند تعلقات کو فروغ دینے کے لیے پاکستان کے عزم کو واضح کرتی ہے۔
بھارت کے بیانیے کی سخت تردید کرتے ہوئے،پاکستانی سفیر محمد خالدجمالی نے زور دے کر کہا کہ پہلگام واقعے کے حوالے سے ثبوت پیش کرنے میں بھارت کی ناکامی کے نتیجے میں بین الاقوامی سطح پر شرمندگی ہوئی ہے۔ انہوں نے کہا کہ پاکستان کا امیج خراب کرنے کی سازش بری طرح ناکام ہو گئی ہے، یہ پاکستان کے اصولی موقف اور بھارت کی جانب سے غیرمصدقہ معلومات کا منہ بولتا ثبوت ہے۔ پاکستان کی خارجہ پالیسی کے مقاصد کا اعادہ کرتے ہوئے پاکستانی سفیر نے تمام ممالک کے ساتھ برابری پر مبنی دوطرفہ تعلقات کی خواہش پر زور دیا۔ تاہم انہوں نے واضح طور پر اعلان کیا کہ پاکستان کے خلاف کسی بھی جارحیت کا بھرپور اور فیصلہ کن جواب دیا جائے گا۔
انہوں نے پاکستانی افواج کی ملکی سرحدوں کی نگرانی اور اس کی خودمختاری کے دفاع کی مکمل صلاحیت کی تعریف کی۔ مزید برآں، انہوں نے خبردار کیا کہ بھارت کی طرف سے جنگ بندی کی کسی بھی خلاف ورزی پر اسے "پہلے سے زیادہ سرپرائز” دیں گے۔ ایک سوال کے جواب میں محمد خالد جمالی نے مشکل وقت میں پاکستان کی سفارتی حمایت پر عالمی برادری کا بھی شکریہ ادا کیا۔ روس اور یوکرین کے جاری تنازع پر انہوں نے پرامن حل کے لیے پاکستان کے عزم کا اعادہ کیا، دونوں ممالک کو متنازعہ مسائل کے حل کے لیے انسانی ہمدردی کی بنیاد پر سفارتی ذرائع استعمال کرتے ہوئے مسئلہ حل کرنےپرزور دیا۔
