اسلام آباد۔30جولائی (اے پی پی):صدر مملکت آصف علی زرداری نے کہا ہے کہ 30 جولائی کو انسانی سمگلنگ کے خلاف عالمی دن منایا جاتا ہے جس کا مقصد اس حوالہ سے خطرات سے دوچار افراد کے تحفظ اور اس سنگین انسانی حقوق کی خلاف ورزی کے بارے میں شعور اجاگر کرنا ہے، پاکستان عالمی شراکت داروں کے ساتھ مل کر انسانی سمگلنگ کے خاتمے اور انسانی استحصال سے پاک دنیا کے قیام کے لیے کوششیں کرتا رہے گا۔ ایوان صدر کے پریس ونگ کے مطابق انسانی سمگلنگ کے خلاف عالمی دن کے موقع پر اپنے پیغام میں صدر مملکت آصف علی زرداری نے کہا کہ 2025 کا موضوع ’’انسانی سمگلنگ منظم جرم ہے:استحصال کا خاتمہ کریں‘‘ واضح کرتا ہے کہ یہ جرم منظم نیٹ ورکس کے ذریعے کیا جاتا ہے۔
صدر آصف علی زرداری نے کہا کہ انسانی سمگلنگ دنیا کے لیے ایک سنگین چیلنج ہے جو لاکھوں افراد کو متاثر کرتی ہے ، غربت، تنازعات، لاعلمی اور غیر محفوظ ہجرت انسانی سمگلنگ کے بنیادی اسباب ہیں ۔ صدر آصف علی زرداری نے کہا کہ خواتین، بچے اور پسماندہ طبقات انسانی سمگلنگ کے سب سے زیادہ متاثرہ گروہ ہیں ،انسانی سمگلر غیر محفوظ راستوں سے ہجرت کراتے ہیں جو ہر سال سینکڑوں قیمتی جانوں کے ضیاع کا سبب بنتی ہے۔صدر آصف علی زرداری نے کہا کہ انسانی سمگلنگ کے خاتمے کے لیے بین الاقوامی تعاون، عوامی آگاہی اور مشترکہ کوششیں ناگزیر ہیں۔
صدر آصف علی زرداری نے کہا کہ پاکستان انسانی سمگلنگ کی روک تھام کے لیے سخت قوانین، موثر اور جدید اقدامات پر عمل پیرا ہے۔صدر آصف علی زرداری نے کہا کہ پاکستان کی متعلقہ ایجنسیاں انسانی سمگلرز کے نیٹ ورکس کو توڑنے اور مجرموں کو انصاف کے کٹہرے میں لانے کے لیے بھرپور کوششیں کر رہی ہیں۔صدر آصف علی زرداری نے کہا کہ پاکستان عالمی شراکت داروں کے ساتھ مل کر انسانی سمگلنگ کے خاتمے اور انسانی استحصال سے پاک دنیا کے قیام کے لیے کوششیں کرتا رہے گا۔
