اسلام آباد۔26اپریل (اے پی پی):سپیکر قومی اسمبلی راجہ پرویز اشرف نے کہا ہے کہ پاکستان علاقائی ترقی، تجارت، توانائی اور معیشت کے استحکام کے لیے قطر کے ساتھ ترجیح بنیادوں پر شراکت داری چاہتا ہے ،تعلیم کے شعبے میں 10 لاکھ پاکستانی بچوں کو تعلیمی سہولیات فراہم کرنے پر قطری حکومت کے شکر گزار ہیں۔
منگل کو سپیکر سے قطر کے سفیر شیخ سعود بن عبد الرحمن بن الفیصل الثانی نے پارلیمنٹ ہاؤس میں ملاقات کی جس میں دوطرفہ تعلقات سمیت باہمی دلچسپی کے اہم امور پر تفصیلی تبادلہ خیال کیا گیا۔ سپیکر راجہ پرویز اشرف نے کہا کہ پاکستان برادر اسلامی ملک قطر کے ساتھ تعلقات کو قدر کی نگاہ سے دیکھتا ہے ۔ برادر ملک قطر نے ہرمشکل گھڑی میں ہمیشہ پاکستان کا ساتھ دیا ہے۔
انہوں نے کہا کہ پاکستان قطر کے ساتھ پارلیمانی روابط اور دوستانہ تعلقات کو مزید فروغ دینے کا خواہاں ہے۔دونوں ممالک کے مابین پارلیمانی وفود کے تبادلوں سے ایک دوسرے کے تجربات سے استفادہ حاصل کر سکتے ہیں۔ قطر کے سفیر نے کہا کہ قطر پاکستان کے ساتھ اپنے قریبی تعلقات کو اہمیت دیتا ہے ۔
قطر پاکستان کے ساتھ سماجی اور اقتصادی شعبوں میں تعاون کا خواہاں ہے۔قطر دس لاکھ بچوں کو تعلیمی سہولیات فراہم کرنے میں پاکستان کی مدد کرے گا۔انہوں نے کہا کہ قطری فرمز پاکستان میں سرمایہ کاری کو فروغ دینے میں گہری دلچسپی رکھتی ہیں۔ پاکستان میں اقتصادی ترقی کے لیے قطر ہر ممکن تعاون جاری رکھے گا۔قطر میں مقیم پاکستانی تارکین وطن قطر کی تعمیر و ترقی میں اہم کردار ادا کر رہے ہیں۔
