اسلام آباد۔18ستمبر (اے پی پی):پاکستان فرنیچر کونسل ( پی ایف سی ) کے چیف ایگزیکٹو آفیسر میاں کاشف اشفاق نے کہا ہےکہ پی ایف سی 13 نومبر سے جرمنی میں شروع ہونے والی 4 روزہ ڈسلڈورف ایکسپو میں شرکت کرے گی
جس سے کاروباری مواقع کی تلاش اور پاکستانی مصنوعات کے لیے نئی منڈیوں تک رسائی میں مدد ملے گی۔ انہوں نے سوموار کو یہاں مارول کیبلز کے سی ای او چوہدری ذیشان الٰہی آرائیں کی قیادت میں صنعتکاروں کے وفد سے گفتگو کرتے ہوئے کہا کہ چن ون کے ساتھ پی ایف سی بھی اس میگا ایونٹ میں شرکت کرے گی۔
انہوں نے کہا کہ یہ ایکسپو پاکستانی مصنوعات کی نمائش اور بین الاقوامی خریداروں کے ساتھ کاروباری معاہدے کرنے کا بہترین موقع ہے۔ انہوں نے کہا کہ پی ایف سی اور چن ون پہلے بھی امریکا، چین، اٹلی اور سری لنکا وغیرہ میں متعدد بین الاقوامی تجارتی میلوں میں شرکت کر چکے ہیں اور انہوں نے اپنی مصنوعات متعارف کرائی ہیں جن کی اب بہت زیادہ مانگ ہے۔
انہوں نے امید ظاہر کی کہ ڈسلڈورف ایکسپو میں شرکت سے غیر ملکی خریداروں سے مزید آرڈر ملیں گے۔ ان کا کہنا تھا کہ وہ پاکستان کی فرنیچر انڈسٹری میں سرمایہ کاری کے لیے بزنس ٹائیکونز کے ساتھ ملاقاتیں بھی کریں گے تاکہ غیر ملکی سرمایہ کاروں کے لیے حکومت کے خصوصی پیکج کا فائدہ اٹھایا جا سکے۔ انہوں نے کہا کہ ٹریڈ ڈویلپمنٹ اتھارٹی برآمدی مصنوعات بنانے والوں کو سہولت فراہم کر رہی ہے۔
