پاکستان لائف سٹائل فرنیچر ایکسپو اسلام آباد میں جاری، پاکستان کا فرنیچر سیکٹر بے پناہ صلاحیت رکھتا ہے، ہارون اختر خان

اسلام آباد۔25اپریل (اے پی پی):پاکستان لائف سٹائل فرنیچر ایکسپو اسلام آباد میں 25 سے 27 اپریل تک جاری ہے جس میں وزیر اعظم کے معاون خصوصی ہارون اختر خان مہمان خصوصی کے طور پر شریک ہوئے۔ اس موقع پر میڈیا سے گفتگو کرتے ہوئے انہوں نے پاکستان کی فرنیچر انڈسٹری کی ترقی کی اہمیت پر زور دیا۔ہارون اختر خان نے کہا کہ پاکستان کا فرنیچر سیکٹر بے پناہ صلاحیت رکھتا ہے،اس صنعت کی ترقی نہ صرف معیشت کو فروغ دے گی بلکہ مقامی تیار کنندگان کو عالمی معیار تک پہنچنے کی ترغیب دے گی۔

انہوں نے مزید کہا کہ ہمیں اپنے مقامی مینوفیکچرز کی بھرپور حمایت کرنی چاہیے تاکہ وہ عالمی معیار کی مصنوعات تیار کر سکیں۔ایکسپو میں جدید و روایتی فرنیچر، ہوم ڈیکور اور ہاتھ سے بنی دستکاریاں شامل ہیں۔ مساج چیئرز اور لکژری فرنیچر نے خاص طور پر شرکاء کی توجہ حاصل کی ہے۔ یہ ایونٹ ڈائمنڈ سپریم فوم اور ڈولچے ویٹا کی سپانسرشپ میں منعقد کیا جا رہا ہے جس کا مقصد پاکستان کی فرنیچر انڈسٹری اور مقامی ہنر کو عالمی سطح پر متعارف کروانا ہے۔

Short Link: https://urdu.app.com.pk/urdu/?p=588038