اسلام آباد۔14مئی (اے پی پی):وزیراعظم محمد شہباز شریف نے کہا ہے کہ پاکستان ایک امن پسند ملک ہے اور اسی جذبے کے تحت بھارت کے ساتھ جنگ بندی پر آمادگی ظاہر کی ہے، پاکستان مستقبل میں کسی بھی جارحیت کا سامنا کرنے اور اپنی خودمختاری و علاقائی سالمیت کے دفاع کے لئے تیار ہے۔ وزیراعظم آفس کے میڈیا ونگ سے جاری بیان کے مطابق وزیراعظم محمد شہبازشریف سے جمہوریہ آذربائیجان کے سفیر خضر فرہادوف نے بدھ کو وزیراعظم ہاؤس میں ملاقات کی۔ملاقات کے دوران وزیراعظم نے جنوبی ایشیاء میں حالیہ کشیدگی کے دوران پاکستان کے ساتھ غیر متزلزل یکجہتی اور حمایت پر صدر الہام علییوف کے ساتھ ساتھ آذربائیجان کے برادر عوام کا تہہ دل سے شکریہ ادا کیا۔ وزیراعظم نے کہا کہ یہ دونوں ممالک کے درمیان پائیدار دوستی کا عکاس ہے۔ ’’آپریشن بنیان مرصوص‘‘ کی کامیابی پر پاکستان کی بہادر مسلح افواج کو دل کی گہرائیوں سے سراہتے ہوئے وزیراعظم نے کہا کہ پاکستانی عوام اس تاریخی فتح پر اللہ تعالیٰ کے شکر گزار ہیں۔
انہوں نے کہا کہ پاکستان ایک امن پسند ملک ہے اور اسی جذبے کے تحت بھارت کے ساتھ جنگ بندی پر آمادگی ظاہر کی ہے تاہم پاکستان مستقبل میں کسی بھی جارحیت کا سامنا کرنے ، اپنی خودمختاری اور علاقائی سالمیت کے دفاع کے لئے تیار ہے۔ پاکستان آذربائیجان تعلقات کے حوالے سے وزیراعظم نے دوطرفہ تعاون میں مثبت پیشرفت پر اطمینان کا اظہار کیا۔ انہوں نے کہا کہ صدر الہام علییوف کا گذشتہ جولائی میں پاکستان کا تاریخی دورہ، معیشت، تجارت اور سرمایہ کاری کے شعبوں میں تعاون کا ایک اہم سنگ میل ہے۔ فروری 2025 میں اپنے دورہ باکو کا ذکر کرتے ہوئے وزیراعظم نے برادرانہ تعلقات کو باہمی طور پر فائدہ مند اقتصادی شراکت داری میں تبدیل کرنے کی پاکستان کی مضبوط خواہش کا اعادہ کیا۔سفیر خضر فرہادوف نے وزیر اعظم اور پوری پاکستانی قوم کو تہہ دل سے مبارکباد دی۔ انہوں نے جنوبی ایشیاء میں امن کے لئے پاکستان کی کوششوں کو سراہا۔
انہوں نے کہا کہ صدر الہام علییوف دونوں ممالک کے درمیان برادرانہ تعلقات کو بہت اہمیت دیتے ہیں۔ دونوں ممالک کی قیادت کے درمیان دستخط شدہ مفاہمت پر عملدرآمد میں پیشرفت کے بارے میں بات کرتے ہوئے انہوں نے وزیراعظم کو دونوں دوست ممالک کے درمیان مشترکہ مفاد کے تمام شعبوں میں تعاون بڑھانے کے لئے اپنے مکمل عزم کا یقین دلایا۔
Short Link: https://urdu.app.com.pk/urdu/?p=597063
