14.6 C
Islamabad
جمعہ, مارچ 14, 2025
ہومقومی خبریںپاکستان میں جنگلی حیات کے تحفظ کی کوششوں میں مثبت پیش رفت،...

پاکستان میں جنگلی حیات کے تحفظ کی کوششوں میں مثبت پیش رفت، گلگت بلتستان میں نایاب چار برفانی تیندوے ایک ساتھ دیکھے گئے

- Advertisement -

اسلام آباد۔14مارچ (اے پی پی):گلگت بلتستان میں چار نایاب برفانی تیندوے (Snow lepopards) ایک ساتھ دیکھے گئے ہیں جو حیاتیاتی تنوع اور ماحولیاتی صحت کے لئے خوش آئند خبر ہے۔ برفانی چیتوں کی شاندار تصویر وائلڈ لائف واچر سخاوت علی اور چیف کنزرویٹر پارکس اینڈ وائلڈ لائف، فاریسٹ، وائلڈ لائف اینڈ انوائرمنٹ ڈیپارٹمنٹ، گلگت بلتستان ڈاکٹر ذاکر حسین نے گلگت بلتستان کے پہاڑوں سے حاصل کی۔ ماہرین کے مطابق برفانی تیندوے عام طور پر چھپ کر رہنے والے جانور ہوتے ہیں اور ان کا اس طرح نظر آنا ایک غیر معمولی واقعہ ہے جو اس خطے میں ان کی افزائش اور بہتر ماحول کی علامت ہو سکتا ہے۔

برفانی تیندوا (Snow Leopard) دنیا کے نایاب اور معدومیت کے خطرے سے دوچار جانوروں میں شامل ہے اور عالمی ادارے اسے تحفظ فراہم کرنے کے لئے مختلف منصوبوں پر کام کر رہے ہیں۔ گلگت بلتستان میں ان کی موجودگی اس بات کا ثبوت ہے کہ مقامی ماحولیاتی نظام اب بھی ان کی بقا کے لئے موزوں ہے۔ ماہرین کا کہنا ہے کہ ان برفانی تیندووں کی موجودگی کو برقرار رکھنے کے لئے ضروری ہے کہ ان کے قدرتی ماحول کا تحفظ کیا جائے اور غیر قانونی شکار کی روک تھام کو یقینی بنایا جائے۔

- Advertisement -

مقامی حکام نے عوام سے اپیل کی ہے کہ وہ جنگلی حیات کے تحفظ میں تعاون کریں اور ان نایاب جانوروں کے بارے میں کسی بھی قسم کی غیر قانونی سرگرمی کی اطلاع دیں۔ یہ دریافت پاکستان میں جنگلی حیات کے تحفظ کی کوششوں میں ایک مثبت پیش رفت قرار دی جا رہی ہے اور ماحولیاتی ماہرین امید کر رہے ہیں کہ مستقبل میں ان جانوروں کی تعداد میں مزید اضافہ ہوگا۔

Short Link: https://urdu.app.com.pk/urdu/?p=572478

- Advertisement -
متعلقہ خبریں
- Advertisment -

مقبول خبریں