پاکستان میں سرمایہ کاری کی وسیع تراستعداد ہے، امریکی سرمایہ کاروں کے وفد کا پاکستان میں آنا اہمیت کا حامل ہے، امریکہ پاکستان کا اہم تجارتی شراکت دار، خرم شہزاد

اسلام آباد۔31جنوری (اے پی پی):وفاقی وزیر خزانہ کے مشیر خرم شہزاد نے کہا ہے کہ امریکی سرمایہ کاروں کے وفد کا پاکستان کا دورہ اور ان کی پاکستان میں کان کنی و معدنیات، توانائی، بنیادی ڈھانچے کی ترقی اور ٹیکنالوجی کے شعبہ میں سرمایہ کاری کی دلچسپی بڑی اہمیت کی حامل ہے، امریکہ کے ساتھ پاکستان کے تجارتی تعلقات بہت اہم ہیں،امریکہ پاکستان کا اہم تجارتی شراکت دارہے، امریکہ کے ساتھ ہماری تجارت فاضل ہے۔انہوں نے یہ بات جمعہ کویہاں ایک انٹرویومیں کہی۔

انہوں نے کہاکہ امریکی سرمایہ کاروں کے وفد کا دورہ پاکستان سے دونوں ممالک کے مابین تعلقات میں مزید بہتری آئے گی، پاکستان کو سرمایہ کاری کی بہت زیادہ ضرورت ہے، ہمارے ہاں معیشت کے حساب سے سرمایہ کاری کم ہے جس کو ہم پانج سے آٹھ فیصد بڑھا سکتے ہیں، چاہتے ہیں کہ ایکسپورٹ لیڈ گروتھ ہو، اس وقت ملک میں معاشی اشاریے مثبت ہیں، ہم کاروبار کرنے کی لاگت میں کمی کی بات کر رہے ہیں، شرح سود میں کمی ہوئی ہے، مہنگائی میں کمی ہوئی ہے، کرنسی میں استحکام اور فارن ریزورز دو،ڈھائی سال پہلے والی سطح پر آگئے ہیں۔ خرم شہزاد نے کہا کہ حکومت کے حجم کو کم کرنا، ریاستی ملکیتی اداروں کو ٹھیک کرنے اور نجکاری کے حوالے سے اقدامات کر رہے ہیں،

سرمایہ کار پاکستان میں جاری اسٹرکچرل ریفارمز پر نگاہ رکھے ہوئے ہیں، امریکی سرمایہ کاروں کا وفد بہت ٹائم پر پاکستان آیا ہے، سمارٹ اور شارپ سرمایہ کار وہاں جاتے ہیں جہاں تبدیلیاں آرہی ہوتی ہیں تاکہ وہاں سے اچھا ریٹرن ملے۔ انہوں نے کہا کہ پاکستان میں سرمایہ کاری کا بہت زیادہ پوٹینشل ہے، ہمارے پاس سرمایہ کاری کے لئے سارے سیکٹر اوپن ہیں، ہم جن سیکٹرز کو ترجیح دیتے ہیں ان میں زرعی شعبہ بہت زیادہ اہم ہے اس کی پوری کی پوری ویلیو چین میں سرمایہ کاری کی جا سکتی ہے، بیرونی سرمایہ کاری کے لئے ہمیں اپنی چیزوں کو ٹھیک کرنا ہے اور چیلنجوں سے نمٹنا ہے۔

Short Link: https://urdu.app.com.pk/urdu/?p=554564