اسلام آباد۔26نومبر (اے پی پی):پاکستان میں گزشتہ 11 ماہ کے دوران 220.89 ملین ڈالر کی اوسط ماہانہ براہ راست غیر ملکی سرمایہ کاری (ایف ڈی آئی) کی گئی ہے، اس دوران سب سے زیادہ ایف ڈی آئی دسمبر 2019 میں 493.03 ملین ڈالر جبکہ سب سے کم براہ راست غیر ملکی سرمایہ کاری اگست 2020 میں 112.34 ملین ڈالر رہی ہے۔ سٹیٹ بینک آف پاکستان (ایس بی پی) کے اعداد وشمار کے مطابق دسمبر 2019 میں غیر ملکی سرمایہ کاروں نے پاکستان میں 493.03 ملین ڈالر کی براہ راست غیر ملکی سرمایہ کاری کی تھی جبکہ گزشتہ 11 ماہ کے دوران پاکستان میں مجموعی طور پر 2429.84 ملین ڈالر کی ایف ڈی آئی کی گئی ہے۔ اس طرح ملک میں کی جانے والی براہ راست غیر ملکی سرمایہ کاری کا اوسط ماہانہ حجم 220.89 ملین ڈالر رہا ہے۔ ایس بی پی کے مطابق جنوری 2020 کے دوران ایف ڈی آئی کا حجم 219.63 ملین ڈالر رہا جبکہ فروری 2020 میں 277.45 ملین ڈالر اور مارچ 2020 کے دوران 278.71 ملین ڈالر کی براہ راست غیر ملکی سرمایہ کاری کی گئی ۔ اسی طرح اپریل 2020 میں ایف ڈی آئی کا حجم 133.17 ملین ڈالر، مئی 2020 میں 120.02 ملین ڈالر جون 2020 میں 174.79 ملین ڈالر کی سرمایہ کاری کی گئی۔ مزید برآں جولائی 2020 کے دوران پاکستان میں 114.31 ملین ڈالر کی ایف ڈی آئی کی گئی تاہم اگست 2020 کے دوران ایف ڈی آئی کا حجم 112.34 ملین ڈالر رہا جو گزشتہ 11 ماہ میں سب سے کم غیر ملکی سرمایہ کاری رہی ہے۔ سٹیٹ بینک کے مطابق ستمبر 2020 کے دوران ملک میں کی جانے والی براہ راست غیر ملکی سرمایہ کاری کا حجم 189 ملین ڈالر رہا تاہم اکتوبر 2020 کے دوران ایف ڈی آئی میں نمایاں اضافہ ہوا اور براہ راست غیر ملکی سرمایہ کاری کا حجم 317.39 ملین ڈالر تک بڑھ گیا۔
