اسلام آباد۔17فروری (اے پی پی):پاکستان نیشنل کونسل آف دی آرٹس اسلام آباد میں امیچور آرٹسٹوں کے فن پاروں کی نمائش منعقد ہوئی۔ ملک بھر کے آرٹسٹوں کے 100 سے زائد بہترین فن پارے نمائش میں رکھے گئے ہیں جن میں نوجوان فنکاروں کی تخلیقی صلاحیتوں کو دیکھا جا سکتا ہے۔ان کے ساتھ ساتھ سدرہ بابر کے فن پاروں کا خصوصی شو بھی نمائش کو چار چاند لگا رہا ہے۔ نمائش کی کیوریٹر سدرہ بابر اور عدیلہ شاہد ہیں۔نمائش میں مختلف طبقہ فکر کے افراد خصوصی دلچسپی لے رہے ہیں۔نامور سیاسی و سماجی شخصیات کے علاوہ دانشوروں،صحافیوں اور کاروباری شعبے کی معزز شخصیات بھی نمائش دیکھنے خاص طور پہ آئیں۔
روڈن انکلیو کے جنرل منیجر محمد راشد افتتاحی تقریب میں بطور مہمان خصوصی موجود تھے۔ اس کے علاوہ ممتاز غیر ملکی مہمان، سیاسی شخصیات، اسلام آباد کی کاروباری برادری کے افراد اور وزیراعظم یوتھ کلب کے نمائندے بھی شریک ہوئے۔تقریب کے دوران محمد راشد نے سدرہ بابر کے تعاون سے روڈن انکلیو میں فنکاروں کے لیے ایک فلاحی ٹرسٹ کے قیام کا اعلان بھی کیا جو فنکاروں کی ترقی اور نوجوان ٹیلنٹ کو وسائل فراہم کرنے میں مدد دے گا۔ انہوں نے یقین دلایا کہ یہ اقدام جلد شروع کیا جائے گا تاکہ فنکاروں کی مسلسل مدد ممکن بنائی جا سکے۔
نمائش کی کیوریٹر اور بصری آرٹ کی ماہر سدرہ بابر نے پاکستان نیشنل کونسل آف دی آرٹس کے ڈائریکٹر جنرل ایم ایوب جمالی اور ویژول آرٹس ڈویژن کا شکریہ ادا کیا کہ انہوں نے نوجوان فنکاروں کو یہ پلیٹ فارم فراہم کیا ہے۔ انہوں نے پاکستان کے مختلف شہروں سے آنے والے نوجوان فنکاروں کی بھرپور شرکت پر بھی ان کا شکریہ ادا کیا اور اس طرح کے پلیٹ فارمز کی اہمیت پر زور دیا جو تخلیقی صلاحیتوں کی نشوونما اور ابھرتے ہوئے فنکاروں کو پہچان دلانے میں مدد دیتے ہیں۔
یہ نمائش بہت کامیاب ثابت ہوئی جس نے فنکارانہ مکالمے اور تعاون کے لیے ایک متحرک ماحول پیدا کیا۔ اس میں شاندار شرکت اور فنون کی حمایت میں بااثر رہنمائوں کے عزم نے پاکستان میں مستقبل کے فنکارانہ منصوبوں کے لیے ایک مضبوط بنیاد رکھ دی ہے۔یہ نمائش عام عوام کے لیے کھلی ہے اور آج 18 فروری تک جاری رہے گی۔ روزانہ کے اوقات: صبح 10 بجے سے شام 4 بجے تک ہیں۔ یہ نمائش جاری ہے اور کل منگل کو اس کا آخری دن ہے۔
Short Link: https://urdu.app.com.pk/urdu/?p=562262
