اسلام آباد۔15فروری (اے پی پی):پاکستان نیشنل ہارٹ ایسوسی ایشن (پی اے این اے ایچ) کے صدر میجر جنرل (ر) مسعود الرحمان کیانی کی قیادت میں وفد نے ہفتہ کو پارلیمنٹ ہاؤس کا دورہ کیا ،دورے کے دوران وفد نے سپیکر قومی اسمبلی سردار ایاز صادق سے ملاقات کی۔ملاقات کے دوران میجر جنرل (ر) مسعود الرحمان کیانی نے سپیکر قومی اسمبلی کو عوام میں دل کی بیماریوں کے بڑھتے ہوئے پھیلاؤ اور اس سے منسلک خطرات بارے آگاہ کیا۔انہوں نے معاشی اور سماجی مسائل کو ان بیماریوں میں اہم کردار ادا کرنے والے عوامل کے طور پر اجاگر کیا اور کہاکہ ملک کی آبادی کا ایک اہم حصہ متاثر ہے۔سپیکر قومی اسمبلی سردار ایاز صادق نے دل کی بیماریوں سے بچنے کے لیے عوام میں صحت مند طرز زندگی کو فروغ دینے کی اہمیت پر زور دیا۔
انہوں نے کہا کہ غیرمتوازن خوراک اور غیر صحت مند طرز زندگی کا انتخاب دل کی بیماریوں اور صحت کے دیگر مسائل کے پھیلاؤ میں اہم کردار ادا کرتے ہیں،جن کے بارے آگاہی مہم چلانے کی ضرورت ہے۔بریفنگ کے دوران پی اے این اے ایچ کے وفد نے انکشاف کیا کہ صرف ذیابیطس کے علاج پر خرچ ہونے والی رقم بین الاقوامی مالیاتی فنڈ (آئی ایم ایف) کو ادا کی جانے والی قسط سے دوگنی ہےجو اس مسئلے کی سنگینی کو اجاگر کرتی ہے۔ وفد نے صحت مند معاشرے کے قیام کے لیے فوری اقدامات پر زور دیا۔ سردارایاز صادق نے وفد کو یقین دلایا کہ وہ ایسی بیماریوں سے بچاؤ کے لیے قانون سازی کے حوالے سے تمام پارلیمانی جماعتوں سے مشاورت کریں گے۔انہوں نے اس بات پر زور دیا کہ صحت مند معاشرے میں کردار ادا کرنے کے لیے
عوامی بہبود کی قانون سازی کے لیے اتفاق رائے پیدا کیا جائے گا۔وفد میں پی اے این اے ایچ کے سیکرٹری جنرل ثناء اللہ گھمن، نائب صدور ڈاکٹر قیوم، کرنل شکیل مرزا، افشاں تحسین باجوہ، کمشنر عبدالحفیظ، غلام عباس اور دیگر اہم شخصیات شامل تھیں۔
