اسلام آباد۔10جولائی (اے پی پی):پاکستان نیوی کیڈٹ کالج اورماڑہ میں سالانہ تقریب تقسیم انعامات کا انعقاد کیا گیا۔وفاقی وزیر برائے دفاعی پیداوا زبیدہ جلال خان تقریب کی مہمان خصوصی تھیں۔کمانڈر کوسٹ وائس ایڈمرل زاہد الیاس بھی تقریب میں شریک تھے۔
پاک بحریہ کے شعبہ تعلقات عامہ سے جاری پریس ریلیز کے مطابق اس موقع پر زبیدہ جلال نے کہا کہ ساحلی علاقوں خصوصاً بلوچستان کے عوام کی فلاح و بہبود میں پاک بحریہ کی کاوشیں قابل تحسین ہیں،پاکستان نیوی کیڈٹ کالج اورماڑہ ساحلی علاقوں کی ترقی کے لئے پاک بحریہ کی کاوشوں کا مظہر ہے۔
مہمان خصوصی نے نمایاں کارکردگی کا مظاہرہ کرنے والے کیڈٹس میں انعامات اور اسناد تقسیم کیں۔ زبیدہ جلال نے کیڈٹ کالج اورماڑہ کے مختلف جاری اور مکمل پراجیکٹس کا بھی جائزہ لیا۔وفاقی وزیر نے پاک بحریہ کےہسپتال پی این ایس درمان جاہ اور بحریہ ماڈل کالج اورماڑہ کا بھی دورہ کیا۔
