اسلام آباد۔26جون (اے پی پی):پاکستان نیٹ بال فیڈریشن کے زیر اہتمام بین الصوبائی نیٹ بال چیمپئن شپ لیاقت جمنازیم اسلام آباد میں شروع ہو گئی۔ چیمپئن شپ کا افتتاح پاکستان سپورٹس بورڈ کے ڈپٹی ڈی جی شاہد اسلام نے کیا۔ اس موقع پر پاکستان نیٹ بال فیڈریشن کے چیئرمین مدثر آرائیں، سیکرٹری جنرل محمد ریاض ، ایسوسی ایٹ سیکرٹری رانا تنویر احمد، اسلام آباد نیٹ بال ایسوسی ایشن (ویمن ونگ) کی صدر صائقہ رانی اور سیکرٹری راحت سلطانہ کے علاوہ شائقین کی کثیر تعداد بھی موجود تھی۔
چیمپئن شپ میں ملک بھر سے مرد اور خواتین کی سات،سات ٹیمیں حصہ لے رہی ہیں جن میں پنجاب، بلوچستان، سندھ، خیبر پختو نخوا، اسلام آباد، آزاد جموں و کشمیر اور گلگت بلتستان کی ٹیمیں شامل ہیں۔ چیمپئن شپ ناک آؤٹ سسٹم پر پی این ایف قوانین کے تحت کھیلی جا رہی ہے۔ چیمپئن شپ کے اختتام پر کامیابی حاصل کرنے والے کھلاڑیوں میں انعامات تقسیم کیے جائیں گے۔
