لاہور۔7مئی (اے پی پی):وزیر اطلاعات پنجاب عظمی بخاری نے کہا ہے کہ پاکستان نے بھارتی جارحیت کا جواب سود سمیت ادا کیا ، مسلح پاک افواج نے ہمیشہ ملک کے چپے چپے کی حفاظت کی، جنگ بھارت نے شروع کی اور اب ختم پاکستان کرے گا۔ بدھ کے روز بھارت کے بزدلانہ حملے پر ردعمل دیتے ہوئے انہوں نے کہا کہ دشمن کی میلی آنکھ کو پھوڑ دینا پاکستانی مسلح فوج پر فرض ہے، بھارت سفید جھنڈے لہرائے یا جو بھی کرے جنگ انڈیا نے شروع کی اور ختم پاکستان کرے گا، افواج پاکستان نے ہمیشہ ملک کے چپے چپے کی حفاظت کی۔عظمی بخاری نے کہا کہ جنگ کے حوالے سے پاکستان اب انڈیا کا شوق اچھے طریقے سے پورا کر ے گا، بھارتی جارحیت کے نتیجہ میں شہید ہونے والے شہریوں کا خون رائیگاں نہیں جائے گا ،پاکستان کو اپنے ایک ایک بے گناہ شہید کا بدلا لینا آتا ہے، ہم نے دشمن کی جارحیت کا جواب سود سمیت ادا کیا ہے۔
صوبائی وزیر اطلاعات نے کہاکہ مودی گجرات کا قصائی تو پہلے ہی تھا، بی جے پی کے دورحکومت میں ہی کیوں فالز فلیگ آپریشن ہوتے ہیں، یہ ہر جگہ سے لعنتیں وصول کر رہے ہیں، ہم ہمسائے کو بدل تو نہیں سکتے لیکن اس کو انسان کا بچہ ضرور بنائیں گے۔
انہوں نے کہا کہ بھارت پوری دنیا کے خلاف اعلان جنگ کرنا چاہتا ہے، یہ پاگل پن اس کو کہاں تک لے جائے اس کا اسے خود اندازہ نہیں ہے،بھارت کے پاس اتنی عقل ہوتی تو مودی ان کا وزیراعظم نہ ہوتا،ترقی یافتہ ممالک کے سربراہوں نے بھی بھارت کے اس اقدام کو شرمناک قرار دیا ہے ، پاکستان نے ہر فورم پر بھارت کو شکست فاش دی ہے ۔
Short Link: https://urdu.app.com.pk/urdu/?p=593896
