نئی دہلی ۔7اپریل (اے پی پی):پاکستان نے بیساکھی میلے میں شرکت کے لئے بھارت کے 6500 سے زائد یاتریوں کو ویزے جاری کر دیئے۔ پاکستان ہائی کمیشن نئی دہلی سے پیر کو جاری اعلامیہ کے مطابق یاتری 10 سے 19 اپریل 2025ءتک پاکستان میں ہونے والی سالانہ تقریبات میں شرکت کریں گے۔ یاتری دیگر مقدس مقامات کے علاوہ گوردوارہ پنجہ صاحب، گوردوارہ ننکانہ صاحب اور گوردوارہ کرتار پور صاحب کی یاترا کریں گے۔ اس موقع پر گفتگو کرتے ہوئے پاکستان ہائی کمیشن نئی دہلی کے ناظم الامور سعد احمد وڑائچ نے کہا کہ
حکومت پاکستان کی جانب سے بڑی تعداد میں ویزوں کا اجراءلوگوں، ثقافتوں اور مذاہب کے درمیان ہم آہنگی کو فروغ دینے کی پالیسی کا مظہر ہے۔ انہوں نے کہا کہ پاکستان مقدس اور مذہبی مقامات کے دوروں میں سہولت فراہم کرنے کا سلسلہ جاری رکھے گا۔ واضح رہے کہ مذہبی مقامات کے دوروں سے متعلق 1974ءکے پاکستان ۔ انڈیا پروٹوکول کے فریم ورک کے تحت ہر سال بھارت سے یاتریوں کی بڑی تعداد مختلف مذہبی تہواروں/مواقع میں شرکت کے لئے پاکستان کا دورہ کرتی ہے۔
Short Link: https://urdu.app.com.pk/urdu/?p=579260
