آکلینڈ۔21مارچ (اے پی پی):حسن نواز اور کپتان سلمان آغا کی شاندار بیٹنگ کی بدولت پاکستان نے میزبان نیوزی لینڈ کو تیسرے ٹی 20 انٹرنیشنل کرکٹ میچ میں باآسانی 9 وکٹوں سے ہرا دیا۔ نیوزی لینڈ ٹیم پہلے بیٹنگ کرتے ہوئے 19.5 اوورز میں 204 رنز بنا کر آؤٹ ہو گئی۔ مارک چیپمین 94 رنز بنائے۔پاکستان کی جانب سے حارث رئوف نے تین جبکہ شاہین شاہ آفریدی،ابرار احمد اور عباس آفریدی نے دو، دو کھلاڑیوں کو آئوٹ کیا۔
جواب میں حسن نواز اور کپتان سلمان آغا کی شاندار پارٹنر شپ کی بدولت پاکستان نے مطلوبہ ہدف 24 گیندوں قبل ایک وکٹ کے نقصان پر حاصل کر لیا۔ حسن نواز ناقابل شکست 105 اور کپتان سلمان آغا ناقابل شکست 51 رنز کے ساتھ نمایاں بلے باز رہے۔ پاکستان کے حسن نواز کو شاندار ناقابل شکست سنچری سکور کرنے پر میچ کا بہترین کھلاڑی قرار دیا گیا۔ جمعہ کو ایڈن پارک، آکلینڈ میں کھیلے گئے تیسرے ٹی ٹونٹی میچ میں پاکستان کے کپتان سلمان آغا نے ٹاس جیت کر پہلے فیلڈنگ کا فیصلہ کیا جو درست ثابت ہوا۔
نیوزی لینڈ کی ٹیم 19.5 اوورز میں 204 رنز بنا کر آؤٹ ہو گئی اور اس نے پاکستان کی ٹیم کو میچ میں کامیابی کے لئے 205 رنز کا ہدف دیا۔ شاہین آفریدی نے پہلے ہی اوور میں کیوی بیٹر فن ایلن کو آؤٹ کردیا۔پہلی وکٹ گرنے کے بعد نیوزی لینڈ نے پلٹ کر جواب دیا اور تیز بیٹنگ کر کے 4 اوورز میں سکور 43 تک پہنچا دیا جس کے بعد ٹم سائفرٹ 19 رنز بنا کر حارث رؤف کا شکار بن گئے۔میچ میں 5 اوورز کے بعد افطار کے لئے وقفہ دیا گیا تو اس دوران پاکستان کرکٹ ٹیم کے کھلاڑیوں نے میدان میں روزہ افطار کیا۔دوسری وکٹ گرنے کے بعد بھی نیوزی لینڈ کے بیٹرز نے تیز رن ریٹ کے ساتھ بیٹنگ جاری رکھی اور 9 اوورز میں سکور 98 تک پہنچا دیا۔
اس دوران مارک چیپمین نے 29 گیندوں پر ایک چھکے اور 7 چوکوں کی مدد سے ففٹی بنائی۔اس کے بعد اگلے اوور کی پہلی ہی گیند پر شاداب خان نے ڈیرل مچل کو 17 رنز پر کیچ آؤٹ کرایا۔پاکستان کے خلاف نیوزی لینڈ کی چوتھی وکٹ 11.5 اوورز میں 135 رنز پر گری، جیمز نیشم کو 3 رنز پر محمد عباس نے آؤٹ کیا۔ پاکستان نے نیوزی لینڈ کی اہم ترین وکٹ 141 رنز پر حاصل کرلی، جارحانہ انداز میں بیٹنگ کرنے والے مارک چیپمین 44 گیندوں پر 94 رنز بنا کر شاداب خان کی گیند پر کیچ آؤٹ ہوئے۔
اس کے بعد نیوزی لینڈ کی لگاتار 2 گیندوں پر 2 وکٹیں 15 ویں اوور میں ابرار احمد نے 164 رنز پر گرائیں۔نیوزی لینڈ کے آٹھویں وکٹ 19ویں اوور میں 193 اور نویں وکٹ 194 رنز پر گری، یہ دونوں وکٹیں حارث رؤف کے حصے میں آئیں۔نیوزی لینڈ کی آخری وکٹ 19.5 اوورز میں 204 رنز پر گری اور اس نے پاکستان کو میچ میں کامیابی کے لئے 205 رنز کا ہدف دیا۔پاکستان کی جانب سے حارث رئوف نے تین جبکہ شاہین شاہ آفریدی،ابرار احمد اور عباس آفریدی نے دو، دو کھلاڑیوں کو آئوٹ کیا۔شاداب خان کے حصے میں ایک وکٹ آئی۔پاکستان ٹیم نے ہدف کے تعاقب کا آغاز شاندار اور جارحانہ انداز میں کیا، پاکستانی اوپنرز محمد حارث اور حسن نواز نے دھواں دھاربیٹنگ کے ذریعے ٹیم کو مضبوط آغاز فراہم کیا۔
دونوں اوپنرز نے پاور پلے کے 6 اوورز کا بہت ہی خوبصورتی اور مہارت کے ساتھ فائدہ اٹھایا اور پارٹنر شپ قائم کر کے 5.5 اوورز میں ٹیم کے مجموعی سکور کو 74 رنز تک پہنچا دیا جس کے بعد محمد حارث 20 گیندوں پر 41 رنز بنا کر آؤٹ ہوگئے۔پہلی وکٹ گرنے کے کے بعد بھی پاکستانی بیٹرز نے ہدف پر نظریں جما کر تیز بیٹنگ جاری رکھی اور 10 اوورز میں ٹیم کے مجموعی سکور کو 124 رنز تک پہنچا دیا۔
اس دوران حسن نواز نے اپنی نصف سنچری بھی مکمل کی جبکہ دوسرے اینڈ سے کپتان سلمان آغا نے بھی تیز رن ریٹ کے ساتھ بیٹنگ جاری رکھی۔دونوں بیٹرز کی تیز بیٹنگ اور پارٹنرشپ کی بدولت پاکستان نے با آسانی میچ 4 اوورز قبل ختم کردیا۔یوں پاکستان نے تیسرے ٹی ٹونٹی میچ میں میزبان نیوزی لینڈ کی ٹیم کو با آسانی 9وکٹوں سے ہرا دیا۔
حسن نواز ناقابل شکست 105 اور سلمان آغا ناقابل شکست 51 رنز کے ساتھ ناٹ آؤٹ رہے۔نیوزی لینڈ کی جانب سے واحد کھلاڑی جیکب ڈفی نے آئوٹ کیا۔پاکستان کے حسن نواز کو عمدہ بلے بازی پر میچ کا بہترین کھلاڑی قرار دیا گیا۔
Short Link: https://urdu.app.com.pk/urdu/?p=575051
