اسلام آباد۔10اپریل (اے پی پی):پاکستان نے ڈیجیٹل مالیاتی نظام میں شفافیت، سیکیورٹی اور جدت کو فروغ دینے کے لیے ورچوئل اثاثہ جات اور ان سے منسلک سروس فراہم کنندگان کی نگرانی کے لیے اپنا پہلا پالیسی فریم ورک تیار کر لیا ہے۔یہ اہم اقدام وزارت خزانہ کی ہدایت پر جنوری 2024 میں قائم کیے گئے قومی ورکنگ گروپ کی کاوشوں کا نتیجہ ہے، جس کی سربراہی وفاقی تحقیقاتی ادارے نے کی، جب کہ نگران ادارے کے طور پر انسداد منی لانڈرنگ اتھارٹی کام کر رہی ہے۔
اس گروپ میں مرکزی بینک، سیکیورٹیز کمیشن، ٹیکس ادارہ، قومی انسداد دہشت گردی ادارہ، وزارت آئی ٹی سمیت دیگر اہم سرکاری و نجی اداروں کے اعلیٰ افسران شامل تھے۔ ڈائریکٹر ایف آئی اے سمیرا اعظم نے اس فریم ورک کو پاکستان کے لیے ایک انقلابی قدم قرار دیتے ہوئے کہا کہ یہ پالیسی ترقی اور قومی سلامتی کے درمیان تاریخی توازن قائم کرتی ہے۔ انہوں نے کہا کہ پاکستان مستقبل کی مالیاتی دنیا کو کھلے دل و دماغ سے اپنا رہا ہے۔
تیار کردہ مسودہ بین الاقوامی معیارات سے ہم آہنگ ہے اور عالمی سطح پر انسداد منی لانڈرنگ سے متعلق تقاضوں کو مدنظر رکھتے ہوئے بنایا گیا ہے۔ اس کا مقصد منی لانڈرنگ، دہشت گردی کی مالی معاونت اور مالیاتی نظام کو لاحق دیگر خطرات سے نمٹنا ہے، جب کہ ساتھ ہی بلاک چین جیسے جدید نظام سے فائدہ اٹھانے کی راہ بھی ہموار کی گئی ہے۔
پالیسی میں ایک تدریجی، لچکدار اور تجرباتی انداز اپنانے کی تجویز دی گئی ہے تاکہ جدت کی حوصلہ افزائی کے ساتھ ادارہ جاتی صلاحیتوں میں بھی بہتری لائی جا سکے۔یہ تاریخی اقدام نہ صرف پاکستان کو علاقائی سطح پر رہنما مقام دے گا بلکہ بین الاقوامی سطح پر کیے گئے وعدوں کی تکمیل کی جانب بھی ایک اہم قدم ثابت ہوگا۔ اس پالیسی کو آئندہ مرحلوں میں مشاورت، قانون سازی اور بتدریج نفاذ کے عمل سے گزارا جائے گا ۔
Short Link: https://urdu.app.com.pk/urdu/?p=580457
