اسلام آباد۔4جولائی (اے پی پی):دفتر خارجہ کی ترجمان ممتاز زہرہ بلوچ نے کہا ہے کہ پاکستان نے گزشتہ سال(2023)جیلوں میں قید 485 بھارتی شہریوں کو رہا کیا جن میں سے 6 سول قیدی اور 479 ماہی گیر شامل تھے، ہم بھارتی جیلوں میں قید تمام پاکستانی قیدیوں کی جلد واپسی کو یقینی بنانے کے لئے بھی کوششیں جاری رکھیں گے۔
جمعرات کو یہاں پریس بریفنگ میں انہوں نے کہا کہ پاکستان اور بھارت نے یکم جولائی 2024 کو 2008 کے قونصلر رسائی کے معاہدے کے تحت ایک دوسرے کی تحویل میں قیدیوں کی فہرستوں کا تبادلہ کیا۔ انہوں نے بتایا کہ پاکستان نے جیلوں میں قید 254 بھارتی شہری قیدیوں اور ماہی گیروں کی فہرست حوالے کی جبکہ بھارت نے اپنی جیلوں میں قید 452 پاکستانی شہری قیدیوں اور ماہی گیروں کی فہرست شیئر کی۔
انہوں نے کہا کہ پاکستان کی جانب سے لاپتہ 38 پاکستانی دفاعی اہلکاروں کی فہرست بھی بھارت کو دی گئی جن کے بارے میں خیال ہے کہ وہ 1965 اور 1971 کی جنگوں سے بھارت کی تحویل میں ہیں۔ ترجمان نے کہا کہ پاکستان ان انسانی مسائل کو ترجیحی طور پر حل کرنے کے لئے پرعزم ہے اور ہم بھارتی جیلوں میں قید تمام پاکستانی قیدیوں کی جلد واپسی کو یقینی بنانے کے لئے بھی کوششیں جاری رکھیں گے۔
ترجمان نے کہا کہ ان کوششوں کے ایک حصے کے طور پر 2023 میں 62 اور 2024 میں 4 پاکستانی قیدیوں کی وطن واپسی ہوئی ۔
Short Link: https://urdu.app.com.pk/urdu/?p=481688
