اسلام آباد۔23مئی (اے پی پی):پاکستان پیڈل فیڈریشن کے زیر اہتمام تین روزہ پاکستان پیڈل رینکنگ کپ 30 مئی سے کراچی میں کھیلا جائے گا۔ گزشتہ روز پاکستان پیڈل فیڈریشن کے صدر محمد متین نے بتایا کہ ٹورنامنٹ کی تیاریاں ابھی سے شروع کردی گئی ہیں اور ایونٹ میں تین کیٹگریز کے مقابلے رکھے گئے ہیں جن میں مینز، ویمنز اینڈ بوائز انڈر-14 کے مقابلے شامل ہیں اور ان مقابلوں میں ملک بھر سے کھلاڑی حصہ لیں گے۔
ٹورنامنٹ کے تمام میچز شام چھ بجے سے رات ایک بجے تک کھیلے جائیں گے۔ ٹورنامنٹ میں 6 لاکھ روپے کی انعامی رقم رکھی گئی ہے اور ٹورنامنٹ کے فائنل مقابلے یکم جون کو کھیلے جائیں گے جن کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔
انہوں نے کہا کہ ٹورنامنٹ میں اچھی کارکردگی دکھانے والے کھلاڑیوں کو قومی ٹیم میں شامل کیا جائے گا اور منتخب ٹیم کے کھلاڑی رواں برس اکتوبر میں کھیلی جانے والی ایشین پیڈل چیمپئن شپ میں شرکت کرے گی۔
Short Link: https://urdu.app.com.pk/urdu/?p=600676
