اسلام آباد۔11مئی (اے پی پی):پاکستان نے امریکی صدر ڈونلڈ جے ٹرمپ کے پاک بھارت تعلقات کے حوالے سے بیان کا خیر مقدم کرتے ہوئے کہا ہے کہ پاکستان اور بھارت کے درمیان حالیہ جنگ بندی ،مفاہمت کی حمایت میں دیگر دوست ریاستوں اور امریکا کے تعمیری کردار کو سراہتے ہیں، جو کشیدگی میں کمی اور علاقائی استحکام کی جانب ایک مثبت قدم ہے۔
ترجمان دفتر خارجہ کی جانب سے اتوار کو جاری پریس ریلیز میں کہا گیا ہے کہ ہم صدر ٹرمپ کی جانب سے جموں و کشمیر تنازعہ کے حل کی کوششوں کی حمایت پر آمادگی کے اظہار کو بھی سراہتے ہیں ۔ یہ ایک دیرینہ حل طلب مسئلہ ہے جس کے جنوبی ایشیا اور خطے سے باہر امن و سلامتی کے لیے سنگین مضمرات ہیں۔
پاکستان اس امر کا اعادہ کرتا ہے کہ جموں و کشمیر کے تنازعہ کا کوئی بھی منصفانہ اور دیرپا تصفیہ اقوام متحدہ کی سلامتی کونسل کی متعلقہ قراردادوں کے مطابق ہونا چاہیے اور کشمیری عوام کے بنیادی حقوق بشمول ان کے ناقابل تنسیخ حق خودارادیت کے حصول کو یقینی بنانا چاہیے۔
پاکستان خطے میں امن، سلامتی اور خوشحالی کے فروغ کی کاوشوں میں امریکہ اور عالمی برادری کے ساتھ شامل ہونے کے لیے پرعزم ہے، ہم امریکہ کے ساتھ کثیر الجہتی شراکت داری اور خاص طور پر تجارت، سرمایہ کاری اور اقتصادی تعاون کے شعبوں میں باہمی تعاون کو مزید وسعت دینے کے خواہاں ہیں ۔
Short Link: https://urdu.app.com.pk/urdu/?p=595613
