لاہور۔9اگست (اے پی پی):صوبائی وزیر خزانہ مجتبیٰ شجاع الرحمان نے کہا ہے کہ پاکستان کا قیام ہمارے اسلاف کی بے مثال قربانیوں کا ثمر ہے، ہماری خوش قسمتی ہے کہ اس وقت ہمیں وزیر اعظم محمد شہباز شریف جیسی قومی اور فیلڈ مارشل عاصم منیر جیسی عسکری قیادت میسر ہے،پاکستان میں تمام میگا پراجیکٹس محمد نواز شریف کی بدولت پایہ تکمیل کو پہنچے۔ان خیالات کااظہار انہوں نے ہفتہ کویہاں پاکستان مسلم لیگ( ن)کے ضمنی گروپ’’لائنز آف مسلم لیگ (ن) ‘‘ کے زیر اہتمام جشنِ آزادی کے حوالے سے منعقدہ تقریب سے خطاب کرتے ہوئے کیا ۔ اس موقع پر پارٹی کارکنان کی کثیر تعداد موجود تھی۔
صوبائی وزیر خزانہ نے پاکستانی عوام کو جشنِ آزادی کی مبارکباد پیش کرتے ہوئے اس دن کو بھرپور جوش و خروش سے منانے کی ترغیب دی۔تقریب سے خطاب کرتے ہوئے انہوں نے کہا کہ اللہ رب العزت کے شکر گزار ہیں کہ آج سے 78 برس قبل ہمیں آزادی کا یہ دن نصیب ہوا، ہماری یہ آزادی ہمارے اسلاف کی بے مثال قربانیوں کا ثمر ہے، زندہ قومیں اپنے یومِ آزادی کو بھرپور جذبے سے مناتی ہیں اور ہمیں بھی اس دن کو اسی ولولے کے ساتھ منانا چاہیے۔ انہوں نے تقریب کے شرکاء کو بتایا کہ پنجاب حکومت رواںسال پورا مہینہ آزادی کا جشن منائے گی، اس سال 14 اگست پر ہمیں دوہری خوشی منانی ہے ، ایک جشنِ آزادی اور دوسرا ’’معرکہ حق‘‘ کی کامیابی کی ۔
قائداعظم محمد علی جناح کی قیادت میں ہم نے آزادی حاصل کی اور قائد مسلم لیگ( ن )محمد نواز شریف کی قیادت میں پاکستان اسلامی دنیا کی پہلی ایٹمی طاقت بنا۔ انہوں نے مزید کہا کہ’’معرکہ حق‘‘ میں کامیابی اس بات کا ثبوت ہے کہ سرکاری و عسکری قیادت ایک پیج پر ہو تو قوم بڑے سے بڑا ہدف بھی حاصل کر لیتی ہے، ہماری خوش قسمتی ہے کہ اس وقت ہمیں وزیر اعظم محمد شہباز شریف جیسی قومی قیادت اور فیلڈ مارشل عاصم منیر جیسی عسکری قیادت میسر ہے، اس جشن آزادی پر ہمیں اپنی دونوں قیادتوں کو خراجِ تحسین پیش کرنا ہے۔
محمد نواز شریف اورمحمد شہباز شریف کی خدمات کا ذکر کرتے ہوئے مجتبی شجاع الرحمان نے کہا کہ جب جب بھی محمد نواز شریف کو عوام کی خدمت کا موقع ملا، انہوں نے پاکستانی عوام کی خدمت میں کوئی کسر نہیں چھوڑی، پاکستان میں جتنے بھی میگا پراجیکٹس پایہ تکمیل کو پہنچے، وہ انہی کی بدولت مکمل ہوئے۔عوامی مسائل پر بات کرتے ہوئے صوبائی وزیر خزانہ نے کہاکہ چینی کے بحران کا مسئلہ جلد وفاقی سطح پر حل کر دیا جائے گا۔تقریب کے اختتام پر پاکستان کی 78 ویں سالگرہ کا کیک کاٹا گیا اور وزیر خزانہ پنجاب نے لائنز آف مسلم لیگ ن کے ممبران میں تعریفی اسناد تقسیم کیں۔
