اسلام آباد۔15مئی (اے پی پی):پاکستان کرپٹو کونسل کے چیف ایگزیکٹوآفیسر بلال بن صقیب نے پاکستان میں قائم مقام امریکی سفیر ناتالیا بیکر سے ملاقات کی جس میں بلاک چین، مصنوعی ذہانت اور نوجوانوں کی ترقی سے متعلق باہمی اہداف پر گفتگو کی گئی۔ملاقات کا محور پاکستان کے باصلاحیت نوجوانوں کو ابھرتی ہوئی ٹیکنالوجیز کی مہارتوں سے لیس کرنا اور امریکی اداروں اور پاکستان کے کاروباری ماحولیاتی نظام کے درمیان روابط قائم کرنا تھا۔ بلال بن صقیب نے اس عزم کا اظہار کیا کہ پاکستان بلاک چین اور اے آئی کو اپنی مستقبل کی معیشت کا مرکز بنا کر عالمی سطح پر ایک مسابقتی جدت طراز ملک بننے کے لیے پرعزم ہے۔
انہوں نے کہاکہ پاکستان دنیا کی سب سے نوجوان آبادی والے ممالک میں سے ایک ہے، پاکستانی نوجوان پرجوش، باصلاحیت، ویب تھری اور اے آئی کے مستقبل کی قیادت کے لیے تیار ہے، اب وقت ہے کہ ان میں سرمایہ کاری کی جائے، انہیں عالمی قائدین سے جوڑا جائے اور پاکستان اور امریکہ کے درمیان مواقع کے پائیدار پل تعمیر کیے جائیں۔انہوں نے بتایا کہ مشترکہ پروگراموں، ٹیلنٹ ایکسچینج، امریکی ٹیک کمپنیوں اور پاکستانی سٹارٹ اپس کے درمیان سٹریٹیجک مفاہمتی یادداشتوں کے آغاز کی منصوبہ بندی جاری ہے تاکہ دونوں ممالک کے مفاد میں طویل المدتی شراکت داری قائم کی جا سکے۔
پاکستان کرپٹو کونسل بلاک چین کو سفارتکاری، تعلیم اور بااختیاری کا ایک موثر ذریعہ بنانے کے لیے پرعزم ہے تاکہ پاکستان کے نوجوان عالمی ڈیجیٹل انقلاب میں پیچھے نہ رہ جائیں بلکہ صف اول میں کھڑے ہوں۔
Short Link: https://urdu.app.com.pk/urdu/?p=597554
