کراچی۔ 27 ستمبر (اے پی پی):پاکستان کرکٹ بورڈ نے ڈائنیٹک کیو لفبرا سے مفاہمت کی یادداشت پر دستخط کردئیے ۔ پاکستان کرکٹ بورڈ سے بدھ کو یہاں جاری اعلامیہ کے مطابق نیشنل کرکٹ اکیڈمی لاہور میں منعقدہ تقریب میں مفاہمتی یادداشت پر دستخط کیے گئے ۔
ایم او یو کا بنیادی نکتہ کرکٹ میں بائیو مکینکل پہلوئوں پر مکمل توجہ مرکوز رکھتے ہوئے ریسرچ اور تجزیے ہیں جن میں فاسٹ بائولرزکے منیجمنٹ پروگرام اور انہیں انجریز سے محفوظ رکھنا، کھلاڑیوں کی فٹنس کو یقینی بنانا، کوچز کی سائنسی خطوط پر تعلیم شامل ہیں جنہیں صرف کوچز ان کے سپورٹ اسٹاف امپائرز اور کیوریٹرز کے ٹریننگ کورس تک محدود نہ رکھا جائے ۔
ڈائنیٹک کیو اور پاکستان کرکٹ بورڈ کے اس اشتراک سے پاکستانی کرکٹرز کو ٹیکنالوجی اور سائنٹیفک مہارت سے منسلک کرکے ان کی مہارت اور کارکردگی میں اضافے میں مدد ملے گی۔ڈائنیٹک کیو پاکستان میں کھلاڑیوں کو ایسے کورسز پیش کرے گا جو کھیل کے مستقبل کے تناظر میں ان کھلاڑیوں کو مکمل معلومات اور مہارت فراہم کریں گے ۔
مفاہمت کی یادداشت پر دستخط کی تقریب میں پاکستان کرکٹ بورڈ کی منیجمنٹ کمیٹی کے چیئرمین ذکا اشرف۔ چیف آپریٹنگ آفیسر سلمان نصیر، نیشنل کرکٹ اکیڈمی کے قائم مقام ڈائریکٹر ذاکرخان۔ ڈائریکٹر انٹرنیشنل عثمان واہلہ۔ ڈائریکٹر ڈومیسٹک ندیم خان اور سینئر جنرل منیجر ڈومیسٹک جنید ضیا شریک ہوئے جبکہ لفبرا کی طرف سے چیف ایگزیکٹیو آفیسر ڈائنیٹک مکی کلارک اور چیف ایگزیکٹیو آفیسر سوچو کرکٹ علی احسن شریک تھے۔
اس موقع پر ذکا اشرف کو پریزنٹیشن دی گئی۔اس موقع پر ذکا اشرف کا کہنا تھا کہ یہ اشتراک اس بات کو ظاہر کرتا ہے کہ ہم پاکستان کرکٹ میں بہترین معیارکو حاصل کرنے کے سلسلے میں کس قدر سنجیدہ ہیں۔ اس ایم او یو سے کھلاڑیوں کی کارکردگی کے سلسلے میں جسمانی پہلوئوں کو بہتر کرنے میں مدد ملے گی اور یہ کھلاڑیوں کی فٹنس میں بہتری کے ضمن میں ایک اہم قدم ثابت ہوگا۔
اس موقع پر مکی کلارک نے اپنے خیالات کا اظہار کرتے ہوئے کہا کہ پاکستان میں فاسٹ بائولنگ کے غیرمعمولی ٹیلنٹ کے ساتھ کام کرنے کا یہ ایک بہترین موقع ہوگا، ہماری کوشش ہے کہ یہ بائولرز جدید سائنٹیفک ٹیکنالوجی استعمال کرتے ہوئے فٹنس کو یقینی بناتے ہوئے اپنی کارکردگی میں بھی اضافہ کریں ۔
Short Link: https://urdu.app.com.pk/urdu/?p=395604
