راولپنڈی۔7جولائی (اے پی پی):پاکستان کرکٹ بورڈ (پی سی بی) نے 26-2025 کے ڈومیسٹک سیزن کا تفصیلی شیڈول جاری کر دیا ہے جس میں تمام فارمیٹس کے مقابلے شامل کیے گئے ہیں۔ سیزن کا آغاز 15 اگست کو حنیف محمد ٹرافی سے ہو گا جبکہ پاکستان کا سب سے بڑا فرسٹ کلاس ٹورنامنٹ "قائد اعظم ٹرافی” 22 ستمبر سے 7 نومبر تک اسلام آباد اور راولپنڈی میں کھیلا جائے گا۔ پی سی بی کے مطابق حنیف محمد ٹرافی میں 12 ٹیمیں شریک ہوں گی اور یہ مقابلے کراچی، ملتان، بہاولپور اور رحیم یار خان میں ہوں گے۔ ٹورنامنٹ کی سر فہرست دو ٹیمیں قائد اعظم ٹرافی میں کوالیفائی کریں گی جس میں مجموعی طور پر 8 ٹیمیں حصہ لیں گی اور 29 میچز پر مشتمل لیگ فارمیٹ میں مقابلے ہوں گے۔
قومی ٹی 20 ٹورنامنٹ کا انعقاد یکم سے 12 مارچ 2026 تک فیصل آباد میں ہو گا۔ رواں سیزن میں نیشنل ٹی 20 کے لیے کوالیفائنگ راؤنڈ بھی متعارف کرایا گیا ہے جس میں 10 ٹیمیں حصہ لیں گی اور سر فہرست دو ٹیمیں سپر 10 مرحلے میں جائیں گی۔ سپر 10 میں 8 ٹیمیں پہلے سے براہ راست شامل ہوں گی جن میں کراچی وائٹس، لاہور وائٹس، پشاور، کراچی بلیوز، سیالکوٹ، اسلام آباد اور فیصل آباد شامل ہیں۔ ڈومیسٹک سیزن میں انڈر 15، انڈر 17 اور انڈر 19 ریجنل ٹورنامنٹس بھی شامل ہیں تاکہ نوجوان ٹیلنٹ کو مواقع دیئے جا سکیں۔ اس کے علاوہ چار ڈیپارٹمنٹل ٹورنامنٹس بھی سیزن کا حصہ ہیں جن میں پریذیڈنٹ ٹرافی، پریذیڈنٹ کپ، گریڈ II اور گریڈ III شامل ہیں۔
پی سی بی کے چیف آپریٹنگ آفیسر سمیر احمد سید کا کہنا ہے کہ 26-2025 کا ڈومیسٹک سٹرکچر میرٹ، مواقع اور سخت مقابلے کی بنیاد پر تیار کیا گیا ہے۔ ہم نے قائد اعظم ٹرافی اور نیشنل ٹی 20 میں کوالیفائر سسٹم متعارف کرایا ہے تاکہ ہر میچ کی اہمیت ہو اور کارکردگی ہی انتخاب کا معیار بنے۔ انہوں نے کہا کہ حنیف محمد ٹرافی میں 12 ریجنز کو خود کو منوانے کا سنہری موقع دیا گیا ہے جبکہ نیشنل ٹی 20 کا سپر 10 فارمیٹ معیاری اور سنسنی خیز کرکٹ کو فروغ دے گا۔ ہمارا مقصد مستقبل کے عالمی سٹارز تیار کرنا ہے۔
ڈائریکٹر ڈومیسٹک کرکٹ آپریشنز عبداللہ خرم نیازی نے کہا کہ ریجنل اور ڈیپارٹمنٹل کرکٹ کو یکساں اہمیت دی گئی ہے۔ انہوں نے کہا کہ نوجوانوں کے لیے انڈر 15، انڈر 17 اور انڈر 19 ٹورنامنٹس ایک نیا پلیٹ فارم مہیا کریں گے۔ حنیف محمد ٹرافی کے نمایاں کھلاڑی قائداعظم ٹرافی میں بطور گیسٹ پلیئرز شامل ہو سکیں گے اور انہیں ڈومیسٹک کنٹریکٹس دیئے جائیں گے جس سے ان کی کارکردگی میں بہتری آئے گی۔ پی سی بی کی اس نئی حکمت عملی سے ڈومیسٹک کرکٹ میں ایک نئے دور کا آغاز متوقع ہے جہاں ٹیلنٹ، کارکردگی اور مواقع کو اولین حیثیت دی گئی ہے۔
