پاکستان کشمیریوں کے حق خودارادیت کا مضبوط حامی ہے، عطاءاللہ تارڑ

اسلام آباد۔27اکتوبر (اے پی پی):وفاقی وزیر اطلاعات ونشریات، قومی ورثہ و ثقافت عطاءاللہ تارڑ نے کہا ہے کہ پاکستان کشمیریوں کے حق خودارادیت کا مضبوط حامی ہے، مسئلہ کشمیر پر وزیراعظم محمد شہباز شریف کا جرات مندانہ موقف کشمیر کاز کو لے کر پاکستان کے غیر متزلزل عزم اور دیرینہ تنازعہ کے منصفانہ اور پرامن حل کی خواہش کا بھرپور اظہار ہے۔ 27 اکتوبر (اتوار کو) یوم سیاہ کشمیر کے موقع پر اپنے پیغام میں وفاقی وزیر اطلاعات نے کہا کہ 27 اکتوبر 1947ءجموں و کشمیر پر بھارت کی فوج کشی کی تاریخ کا سیاہ ترین دن ہے،

بھارت نے اس روز کشمیریوں کی خواہشات کے برخلاف اپنی فوجیں کشمیر میں اتار کر غیر قانونی طور پر قبضہ کیا۔ انہوں نے کہا کہ بھارتی فاشسٹ حکومت کے مظالم اور ظالمانہ پالیسیوں کے باوجود کشمیری عوام اپنی آزادی کیلئے بے باک اور غیرت مند جدوجہد کر رہے ہیں۔ انہوں نے کہا کہ کشمیری عوام مقبوضہ جموں و کشمیر پر بھارت کے غاصبانہ قبضے کو کبھی قبول نہیں کریں گے۔ عطاءاللہ تارڑ نے کہا کہ پاکستان کبھی بھی دنیا میں کشمیریوں کے جائز مقصد کی وکالت سے پیچھے نہیں ہٹا،

پاکستان ہمیشہ کشمیری عوام کے ساتھ کھڑا ہے اور ان کے حق خودارادیت کی حمایت جاری رکھے گا۔ انہوں نے کہا کہ مسئلہ کشمیر کا واحد قابل قبول حل اقوام متحدہ کی زیر نگرانی رائے شماری ہے لیکن بھارت کشمیر کی قانونی حیثیت کو ختم کرنے کے درپے ہے۔ انہوں نے کہا کہ عالمی برادری مسئلہ کشمیر کا پرامن حل نکالنے کے لئے اپنا کردار ادا کرے اور بھارت کو انسانی حقوق کی خلاف ورزیوں سے باز رکھے۔ انہوں نے کہا کہ ہم یقین رکھتے ہیں کہ کشمیری عوام اپنی منزل مقصود تک ضرور پہنچیں گے اور آزادی کا خواب تعبیر ہوگا۔