اسلام آباد۔4جنوری (اے پی پی): پاکستان نے اسرائیلی وزیر برائے قومی سلامتی کے مسجد اقصیٰ کے احاطے کے دورے کے اشتعال انگیز اقدام کی شدید مذمت کی ہے۔بدھ کو دفتر خارجہ کی ترجمان ممتاز زہرہ بلوچ نے ایک بیان میں کہا ہے کہ مسجد الاقصیٰ ایک مقدس مقام ہے جس کا دنیا بھر کے مسلمان احترام کرتے ہیں، اس کے تقدس کی خلاف ورزی مسلمانوں کی مذہبی حساسیت کو مجروح کرتی ہے اور مقبوضہ فلسطینی علاقوں میں پہلے سے کشیدہ صورتحال کو ہوا دیتی ہے۔
انہوں نے کہا کہ اسرائیل کو چاہئے کہ وہ اپنے غیر قانونی اقدامات بند کرے اور مقبوضہ فلسطینی علاقوں میں مسلمانوں کے مذہبی مقامات کے تقدس کا احترام کرے۔ترجمان دفتر خارجہ نے کہا کہ پاکستان فلسطینی عوام کی جائز جدوجہد کی بھرپور حمایت کا اعادہ کرتا ہے، پاکستان اقوام متحدہ اور او آئی سی کی متعلقہ قراردادوں کے مطابق 1967 سے پہلے کی سرحدوں کے ساتھ ایک قابل عمل، خود مختار اور متصل فلسطینی ریاست جس کا القدس الشریف دارالحکومت ہو ، کے اپنے مطالبے کی تجدید کرتا ہے ۔
Short Link: https://urdu.app.com.pk/urdu/?p=344723
