اسلام آباد۔21فروری (اے پی پی):وزیراعظم محمد شہباز شریف نے کہا ہے کہ پاکستان کی افرادی قوت ملک کا اصل اثاثہ ہے ،پاکستان کے نوجوانوں کو بین الاقوامی سطح پر مطلوبہ پیشہ وارانہ ہنر سے لیس کرنا حکومت کی اولین ترجیحات میں شامل ہے،پاکستان میں نرسنگ کی تربیت کیلئے اداروں کی تعداد کو بڑھایا جائے، نرسنگ کی تربیت کو بین الاقوامی معیار سے ہم آہنگ کرنے کیلئے اقدامات یقینی بنائے جائیں، نوجوانوں کو مختلف شعبوں میں پیشہ وارانہ تربیت کیلئے صنعت ملکی اور بین الاقوامی مارکیٹ کو مدنظر رکھا جائے،نیوٹیک کو نوجوانوں کی پیشہ وارانہ تربیت کیلئے ہر قسم کی فنڈنگ فراہم کی جائے گی، نیوٹیک ناقص کارکردگی والے تربیتی اداروں کو بلیک لسٹ اور اچھی کارکردگی والے اداروں کی حوصلہ افزائی کرے۔
جمعہ کو وزیراعظم آفس کے پریس ونگ سے جاری بیان کے وزیراعظم محمد شہباز شریف نے نوجوان افرادی قوت کی پیشہ وارانہ تربیت کے حوالے سے بین الوزارتی جائزہ اجلاس کی صدارت کی۔اجلاس میں نیوٹیک ، وزارت انفارمیشن ٹیکنالوجی، وزارت سمندر پار پاکستانی اور وزارت صحت کی جانب سے نوجوانوں کی پیشہ وارانہ تربیت کے حوالے سے آئندہ تین سال کا لائحہ عمل پیش کیا گیا۔ اجلاس کو بتایا گیا کہ نیوٹیک رواں برس اب تک 60 ہزار اور جون 2025 تک ایک لاکھ 41 ہزار نوجوانوں کو آئی ٹی سمیت مختلف شعبوں میں پیشہ وارانہ تربیت فراہم کرے گا۔ مزید برآں 2026 میں 2 لاکھ 50 ہزار جبکہ 2027 میں 3 لاکھ 37 ہزار نوجوانوں کو مختلف شعبوں میں تربیت دے گا۔
اجلاس کو بتایا گیا کہ نیوٹیک کے تحت 29 ہزار سے زائد افراد تربیت حاصل کرکے سعودی عرب میں روزگار حاصل کر چکے جبکہ دسمبر 2025 تک 40 ہزار، 2026 میں ایک لاکھ جبکہ 2027 میں ایک لاکھ 50 ہزار افراد کو پیشہ وارانہ تربیت فراہم کرکے سعودی عرب میں روزگار کا ہدف رکھا گیا ہے۔ اسی طرح دسمبر 2025 تک دیگر ممالک میں پیشہ وارانہ ہنر سے لیس 50 ہزار پاکستانیوں، 2026 میں ایک لاکھ جبکہ 2027 میں 2 لاکھ افراد کو بیرون ملک روزگار دلوانے کا ہدف رکھا گیا ہے۔ اجلاس کو بتایا گیا کہ نیوٹیک کے ذریعے پاکستانی تربیتی اداروں کی مختلف بین الاقوامی اداروں سے ایکریڈیٹیشن کا عمل بھی تیزی سے جاری ہے جس کے تحت جون 2025 تک 72 بین الاقوامی اداروں کی جانب سے ایکریڈیٹیشن حاصل کرنے کا ہدف رکھا گیا ہے۔
اجلاس کو ملکی صنعت میں درکار ہنر و پیشہ وارانہ تربیت کے سروے، جدید نصاب کے اطلاق، مقامی اداروں کی ایکریڈیٹیشن اور ٹرینرز کی لائسنسنگ پر پیشرفت و کارکردگی سے بھی آگاہ کیا گیا۔ اجلاس کو بتایا گیا کہ ان تربیتی پروگرامز میں مدرسہ جات کے 2500 سے زائد طلبہ کو تربیت دی جا چکی جبکہ مدارس کے جون 2025 تک 3 ہزار، 2026 میں 20 ہزار اور 2027 میں 30 ہزار طلباء کو مختلف شعبوں میں پیشہ وارانہ تربیت کی فراہمی یقینی بنائی جائے گی۔ اجلاس کو مزید بتایا گیا کہ ان تربیتی پروگرامز کو چاروں صوبوں سمیت گلگت بلتستان اور آزاد کشمیر میں بھی فراہم کیا جارہا ہے۔ اجلاس میں وزارت آئی ٹی کی جانب سے بتایا گیا کہ آئندہ تین برس میں وزارت ملک بھر میں 92 ہزار سے زائد نوجوانوں کو جدید آئی ٹی کورسز میں تربیت اور 21 لاکھ فری لانسرز تیار کرنے کے ہدف کو پورا کرنے کیلئے اقدامات کر رہی ہے۔
اجلاس کو نیشنل آئی سی ٹی سکلز ایکوسسٹم کے قیام کے حوالے سے تفصیلی بریفنگ دی گئی جس سے نہ صرف نوجوان مقامی صنعت بلکہ بیرون ملک بھی روزگار کے موجود مواقع سے مستفید ہوں گے۔اجلاس میں ملک کے نرسنگ شعبے میں تربیتی پروگرامز، نرسنگ کے شعبے کی طلب اور پاکستانی نرسوں کی بیرون ملک روزگار کے حوالے سے بھی تفصیلی بریفنگ دی گئی۔اجلاس میں نرسنگ شعبے کی اصلاحات کا روڈ میپ بھی پیش کیا گیا۔ وزیراعظم نے نرسنگ سکولز کی تعداد میں اضافے اور موجودہ نرسنگ سکولز میں تربیت کے معیار کو بین الاقوامی تقاضوں سے ہم آہنگ کرنے کی ہدایت کی۔ اجلاس میں وفاقی وزراء احد خان چیمہ، چوہدری سالک حسین، وزیرِ مملکت آئی ٹی شزہ فاطمہ خواجہ، وزیرِ اعظم کے کوآرڈینیٹر برائے صحت ڈاکٹر مختار احمد بھرتھ، چیئرمین ایچ ای سی ڈاکٹر مختار احمد اور متعلقہ اعلیٰ حکام نے شرکت کی۔
Short Link: https://urdu.app.com.pk/urdu/?p=564614
