پاکستان کی جانب سے بھارتی جارحیت کی شدید مذمت، مریدکے و بہاولپور میں بین الاقوامی سرحد ، کوٹلی اور مظفرآباد میں لائن آف کنٹرول کے پار شہری آبادی کو نشانہ بنایا گیا، ترجمان دفتر خارجہ

اسلام آباد۔7مئی (اے پی پی):پاکستان نے بھارتی جارحیت کی شدید مذمت کرتے ہوئے کہا ہے کہ جنگ کی ایک بلا اشتعال اور صریح کارروائی میں بھارتی فضائیہ نے اپنی فضائی حدود میں رہتے ہوئے بین الاقوامی سرحد کے پار شہری آبادی کو نشانہ بناتے اور سٹینڈ آف ہتھیاروں کا استعمال کرتے ہوئے پاکستان کی خودمختاری کی خلاف ورزی کی ، مریدکے اور بہاولپور میں بین الاقوامی سرحد اور کوٹلی اور مظفرآباد آزاد جموں و کشمیر میں لائن آف کنٹرول کے پار شہری آبادی کو نشانہ بنایا گیا ۔

ترجمان دفتر خارجہ کی جانب سے جاری بیان کے مطابق بھارت کی جارحیت کے نتیجے میں خواتین اور بچوں سمیت شہریوں کی شہادت ہوئی ہے۔ جارحیت کے اس عمل سے تجارتی فضائی ٹریفک کو بھی شدید خطرہ لاحق ہوگیا ہے۔ بیان میں کہا گیا ہے کہ ہم بھارت کے بزدلانہ اقدام کی شدید مذمت کرتے ہیں جو اقوام متحدہ کے چارٹر، بین الاقوامی قانون اور بین ریاستی تعلقات کے قائم کردہ اصولوں کی کھلی خلاف ورزی ہے۔ بیان کے مطابق پہلگام واقعے کے تناظر میں بھارتی قیادت نے ایک بار پھر دہشت گردی کی

بونگی کا استعمال کرتے ہوئے اپنی مظلومیت کی شرمناک داستان کو آگے بڑھایا جس سے علاقائی امن و سلامتی کو خطرہ ہے، بھارت کی لاپرواہی سے دو ایٹمی ریاستیں ایک بڑے تنازعے کے قریب پہنچ گئی ہیں، بدلتی صورتحال میں پاکستان اقوام متحدہ کے چارٹر کے آرٹیکل 51 کے مطابق اور بین الاقوامی قانون کے مطابق اپنی پسند کے وقت اور جگہ پر مناسب جواب دینے کا حق محفوظ رکھتا ہے۔ بیان کے مطابق پاکستان کی حکومت، مسلح افواج اور عوام بھارتی جارحیت کے خلاف متحد ہیں، پاکستان کی خودمختاری اور علاقائی سالمیت کے تحفظ کے لیے ہمیشہ آہنی عزم کے ساتھ کام کریں گے

Short Link: https://urdu.app.com.pk/urdu/?p=593729