پاکستان کی خودمختاری اور سلامتی پر کوئی آنچ نہیں آنے دیں گے، بہادر جوانوں کی قربانیوں پر فخر ہے، صدر مملکت آصف علی زرداری

اسلام آباد۔14مئی (اے پی پی):صدر مملکت آصف علی زرداری نے کہا ہے کہ پاکستان کی خودمختاری اور قومی سلامتی پر کوئی آنچ نہیں آنے دیں گے، پاکستان ہر قسم کی جارحیت کا منہ توڑ جواب دینے کی مکمل صلاحیت رکھتا ہے، مودی حکومت پاکستان کے خلاف جارحیت کو سیاسی مقاصد کیلئے استعمال کرنا چاہتی ہے۔

انہوں نے یہ بات بدھ کو سی ایم ایچ راولپنڈی کے دورہ کے موقع پر کہی جہاں انہوں نے بلااشتعال بھارتی حملوں میں زخمی ہونے والے پاک فوج کے جوانوں اور متاثرہ شہریوں کی عیادت کی۔بدھ کو ایوان صدر کے میڈیا ونگ سے جاری بیان کے مطابق اس موقع پر وفاقی وزیر داخلہ محسن رضا نقوی، کمانڈر 10 کور اور ہسپتال کی انتظامیہ بھی صدر مملکت کے ہمراہ تھی۔ صدر مملکت نے زخمیوں سے فرداً فرداً ملاقات کی اور ان کی بہادری، قربانی اور حب الوطنی کو سراہا۔

صدر مملکت آصف علی زرداری نے کہا کہ ہمیں اپنے بہادر جوانوں کی قربانیوں پر فخر ہے، پوری قوم اپنے سپاہیوں اور شہریوں کی قربانیوں کو سلام پیش کرتی ہے، پاکستانی قوم نے دشمن کی جارحیت کا ڈٹ کر مقابلہ کیا۔ انہوں نے کہا کہ بھارت کا رویہ جارحانہ، شدت پسندانہ اور علاقائی امن کے لیے خطرہ ہے، ہندوتوا نظریہ سے پورے خطہ کی سلامتی کو شدید خطرات ہیں۔

انہوں نے کہا کہ مودی حکومت پاکستان کے خلاف جارحیت کو سیاسی مقاصد کیلئے استعمال کرنا چاہتی ہے ، پاکستان کی خودمختاری اور قومی سلامتی پر کوئی آنچ نہیں آنے دیں گے۔ صدر مملکت نے کہا کہ پوری قوم کسی بھی جارحیت سے نمٹنے کیلئے متحد، پرعزم اور ہوشیار ہے، پاکستان ہر قسم کی جارحیت کا منہ توڑ جواب دینے کی مکمل صلاحیت رکھتا ہے۔

صدر مملکت نے ہسپتال کے ڈاکٹروں، طبی عملے، نرسنگ سٹاف اور انتظامیہ کا زخمیوں کی دیکھ بھال پر شکریہ ادا کیا۔

Short Link: https://urdu.app.com.pk/urdu/?p=597125