دبئی۔5فروری (اے پی پی):سال کا سب سے بڑا پبلک پرائیویٹ اے آئی اجتماع اے آئی ایوری تھنگ گلوبل 2025 گزشتہ روز ابوظہبی میں شروع ہوا جو 6 فروری تک دبئی میں جاری رہے گا جس میں 70 ممالک سے 500 سے زائد نمائش کنندگان اور 150 سرمایہ کاروں نے شرکت کی۔
جی آئی ٹی ای ایکس کی کامیابی سے متاثر ہو کر یہ ایونٹ صنعت کے رہنمائوں، حکومتوں اور جدت طرازوں کے لیے تیزی سے بدلتے ہوئے مصنوعی ذہانت (اے آئی) کے منظرنامے کو دریافت کرنے کے لیے ایک عالمی پلیٹ فارم کے طور پر کام کرتا ہے۔
پاکستان سافٹ ویئر ایکسپورٹ بورڈ (پی ایس ای بی) اور ٹریڈ ڈویلپمنٹ اتھارٹی آف پاکستان (ٹی ڈی اے پی) کے تحت 11 معروف ٹیک کمپنیوں اور دو مصنوعی ذہانت سے چلنے والے سٹارٹ اپس کے ساتھ اس ایونٹ میں پاکستان نے بھرپور شرکت کی۔ دبئی میں پاکستانی قونصل خانے کے کمرشل سیکشن کی جانب سے شرکت کی سہولت فراہم کی گئی ہے جس میں 30 سے زائد پاکستانی مندوبین مصنوعی ذہانت سے چلنے والی معاشی تبدیلی پر تبادلہ خیال میں فعال طور پر حصہ لے رہے ہیں۔
ایونٹ میں اے ایس یو ایس، علی بابا کلائوڈ، اے ڈبلیو ایس، ڈیل، ای اینڈ، فورٹینیٹ، جی 42، ایچ پی، آئی بی ایم، انٹیل، لینوو، نوکیا، اوریکل، ریڈ ہیٹ، ٹیکنالوجی انوویشن انسٹی ٹیوٹ (ٹی آئی آئی) اور زوم سمیت عالمی ٹیک پاور ہائوسز نے شرکت کی جو حکومتوں اور کاروباری اداروں کو نئی شکل دے رہے ہیں۔ نمائش میں زیادہ توجہ عالمی معیشتوں کو چلانے میں اوپن سورس مصنوعی ذہانت کے کردار اور گورننس، انٹرپرائز حل اور عوامی خدمات پر اس کے اثرات پر مرکوز ہے۔
مصنوعی ذہانت کے ذریعے 2030 تک متحدہ عرب امارات کی جی ڈی پی میں 100 بلین ڈالر کا حصہ شامل کرنے کی توقع ہے جو مصنوعی ذہانت کے لئے متحدہ عرب امارات کی قومی حکمت عملی 2031 اور ابوظہبی حکومت کی ڈیجیٹل حکمت عملی 2025-2027 کے ساتھ ہم آہنگ ہے۔
یہ متحدہ عرب امارات کے عالمی مصنوعی ذہانت کے رہنما بننے کے عزم کو اجاگر کرتا ہے جس میں مصنوعی ذہانت جیسے واقعات علم کے تبادلے اور تعاون کے لئے ایک ضروری پلیٹ فارم فراہم کرتے ہیں۔پاکستان پویلین کا افتتاح متحدہ عرب امارات میں پاکستان کے سفیر فیصل نیاز ترمذی، پی ایس ای بی کے سی ای او ابو بکر اور ٹریڈ قونصلر علی زیب خان نے کیا۔
اس موقع پر خطاب کرتے ہوئے سفیر فیصل نیاز ترمذی اور سی ای او پی ایس ای بی نے پاکستانی ٹیک فرموں پر زور دیا کہ وہ مصنوعی ذہانت کے ٹیلنٹ کی ترقی میں فعال کردار ادا کریں۔ انہوں نے پاکستان کی افرادی قوت کو مستقبل کے تقاضوں سے ہم آہنگ کرنے اور ملک میں تکنیکی ترقی کو آگے بڑھانے کے لئے آئندہ نسل کو ضروری مصنوعی ذہانت اور کوڈنگ کی مہارتوں سے آراستہ کرنے کی اہمیت پر زور دیا۔
اے آئی ایوری تھنگ گلوبل 2025 میں پاکستان کی شرکت عالمی سطح پر مصنوعی ذہانت اور ٹیکنالوجی کے میدان میں اپنی موجودگی کو مستحکم بنانے، تعاون کو فروغ دینے اور تیزی سے بڑھتے ہوئے مصنوعی ذہانت کے ایکو سسٹم میں نئے مواقع پیدا کرنے کی سمت میں ایک اہم قدم ہے۔
