پاکستان کی معاشی ترقی کے لئے مالیاتی پالیسی، محصولات پالیسی اور پیداواری پالیسی کا یکسو ہونا ضروری ہے، وزیراعظم شہباز شریف کی برطانوی ماہر معیشت پروفیسر ڈاکٹر سٹیفن ڈرکن سے ملاقات میں گفتگو

اسلام آباد۔23مئی (اے پی پی):وزیراعظم محمد شہباز شریف نے کہا ہے کہ کاروبار کو فروغ دینے کے لیے تمام پالیسیوں میں عمدہ توازن بے حد ضروری ہے، پاکستان کی معاشی ترقی کے لئے مالیاتی پالیسی، محصولات کی پالیسی اور پیداواری پالیسی کا یکسو ہونا ضروری ہے۔جمعہ کو وزیراعظم آفس کے میڈیا ونگ سے جاری کردہ بیان کے مطابق وزیر اعظم شہباز شریف سے برطانوی ماہر معیشت پروفیسر ڈاکٹر سٹیفن ڈرکن نے ملاقات کی۔

وزیراعظم نے کہا کہ کاروبار کو فروغ دینے کے لیے تمام پالیسیوں میں عمدہ توازن بے حد ضروری ہے، پاکستان کی معاشی ترقی کے لئے مالیاتی پالیسی، محصولات کی پالیسی اور پیداواری پالیسی کا یکسو ہونا ضروری ہے۔ انہوں نے کہا کہ گزشتہ ادوار میں پاکستانی اشیاء کی دنیا بھر میں مانگ تھی اور پاکستان کا شمار برآمدی ممالک میں ہوتا تھا، ہم پاکستان کو دوبارہ اسی مقام پر لے جانا چاہتے ہیں، اس کے لئے معیشت میں ایسی اصلاحات درکار ہیں جس سے نظام دوبارہ برآمدی ترقی کی جانب گامزن ہو جائے۔

پروفیسر ڈاکٹر سٹیفن ڈرکن نے حکومتی معاشی پالیسی کی درست سمت اور اصلاحات کی تعریف کی۔ بیرونی سرمایہ کاروں کے پاکستان کے حوالے سے مثبت رجحانات کا ذکر کرتے ہوئے انھوں نے ٹیرف ریشنلائزیشن پالیسی کو سراہا۔ ملاقات میں وزیر خزانہ محمد اورنگزیب، وزیر ترقی و منصوبہ بندی ڈاکٹر احسن اقبال، وزیر اقتصادی امور احد خان چیمہ، وزیر پاور اویس خان لغاری، وزیر پٹرولیم علی پرویز ملک اور متعلقہ اداروں کے اعلیٰ افسران شریک تھے۔

Short Link: https://urdu.app.com.pk/urdu/?p=600742