اسلام آباد۔24اگست (اے پی پی):پاکستان کی کرپٹو حکمت عملی عالمی سطح پر تیز رفتاری سے کامیابی کی جانب گامزن ہے،پاکستان کا کرپٹو ریزرو کا تصور حقیقت میں منتقل ہو رہا ہے،پاکستان نے اپنے ‘ بٹ کوائن اسٹریٹیجک ریزرو ‘ کی تشکیل کے ذریعے عالمی کرپٹو حکمت عملی میں شمولیت اختیار کی ہے۔
وزیر مملکت برائے کرپٹو اور بلاک چین بلال بن ثاقب کی 2018 میں کرپٹو مارکیٹ کے حوالے سے کی گئی پیشگوئیاں درست ثابت ہوئیں۔پاکستان ورچوئل اثاثہ جات ریگولیٹری اتھارٹی کا قیام، پاکستان کی کرپٹو مارکیٹ کے لیے ایک اہم قدم ہے۔بلال بن ثاقب نے پاکستان کی کرپٹو ڈپلومیسی کو نئی شکل دی اور عالمی سطح پر ملکی معاشی ترقی کی راہ ہموار کی ہے۔
بلال بن ثاقب نے کہا ہے کہ پاکستان آج ایک چھپے ہوئے خزانے کی طرح ہے جس کی حقیقی طاقت مستقبل میں ظاہر ہوگی جبکہ کرپٹو ڈپلومیسی نے پاکستان کو دنیا میں وصول کنندہ کی بجائے بلڈر کے طور پر متعارف کرایا ہے ۔ اسی طرح فنانشل ٹائمز نے کہا ہے کہ پاکستان کی کرپٹو حکمت عملی عالمی سطح پر تیز رفتاری سے کامیابی کی جانب گامزن ہے،پاکستان کا کرپٹو ریزرو منصوبہ انقلابی اقدام بن گیا ہے اور عالمی سطح پر اس کی پذیرائی میں نمایاں اضافہ ہوا ہے۔
