اسلام آباد۔3اکتوبر (اے پی پی):انسٹی ٹیوٹ آف سٹریٹجک اسٹڈیز اسلام آباد (آئی ایس ایس آئی ) اور میانمار انسٹی ٹیوٹ آف انٹرنیشنل سٹڈیز نے جمعرات کو یہاں ایک ورکنگ پروٹوکول پر دستخط کئے جس کا مقصد دونوں تھنک ٹینکس کے درمیان گہرے تعاون کو فروغ دینا ہے۔ اسلام آباد میں میانمار کے سفیر اور ینگون میں پاکستان کے ناظم الامور نے دستخطو ں کی تقریب میں شرکت کی۔ آئی ایس ایس آئی کے ڈائریکٹر ڈاکٹر خرم عباس نے تقریب کی نظامت کی جنہوں نے کہا کہ یہ پروٹوکول دونوں اداروں کے مشترکہ تحقیق اور باہمی دلچسپی کے امور پر پالیسی ایڈوائزری کو فروغ دینے کے عزم کا ثبوت ہے۔
ڈی جی آئی ایس ایس آئی سہیل محمود نے اس موقع پر کہا کہ عالمی تبدیلیوں اور ان کے اثرات کو سمجھنے کے لئے مضبوط تحقیق، باخبر تجزیہ اور علمی تعاون ضروری ہے۔ انہوں نے میانمار کے ساتھ پاکستان کے دیرینہ تعلقات کو اجاگر کرتے ہوئے کہا کہ دونوں ممالک سفارتی، اقتصادی، سیکورٹی اور ثقافتی شعبوں میں کئی دہائیوں سے تعاون کرتے رہے ہیں۔ انہوں نے کہا کہ یہ پروٹوکول آسیان کے رکن ممالک میں تھنک ٹینکس کے ساتھ تعلقات کو مضبوط بنانے کے لئے انسٹی ٹیوٹ آف سٹریٹجک سٹڈیز کی وسیع تر کوششوں کا حصہ ہے۔ میانمار انسٹی ٹیوٹ آف اسٹریٹجک اینڈ انٹرنیشنل اسٹڈیز کے چیئرمین یو تھانٹ کیاو نے پروٹوکول کو عملی جامہ پہنانے میں شامل تمام افراد کا شکریہ ادا کیا۔ انہوں نے کہا کہ یہ باہمی احترام اور اعتماد کی علامت ہے جو مستقبل میں تعاون اور مشترکہ تحقیقی کوششوں کے لئے ایک مضبوط بنیاد رکھے گا۔
پاکستان میں میانمار کے سفیر وونا ہان نے دستخط کو فریقین کے درمیان تعلقات میں سنگ میل قرار دیا۔ انہوں نے کہا کہ یہ پروٹوکول باہمی تعاون پر مبنی تحقیقی منصوبوں کو مزید فروغ دے گا جو پاکستان اور میانمار تعلقات کی مثبت عکاسی کرے گا۔ ینگون میں پاکستان کے ناظم الامور انور زیب نے خوشگوار دوطرفہ تعلقات کی ترقی کو آگے بڑھانے میں تھنک ٹینک تعاون کی اہمیت کو اجاگر کیا اور مستقبل کے مشترکہ اقدامات کے لیے مسلسل حمایت کا یقین دلایا۔دونوں اداروں نے باہمی تعاون پر مبنی منصوبوں پر فالو اپ اور متعلقہ اشاعتوں کے اشتراک کے لئے فوکل پرسن مقرر کرنے پر بھی اتفاق کیا۔دستخط کی تقریب علاقائی اور بین الاقوامی مسائل کی گہرائی سے سمجھنے میں تعاون کرتے ہوئے علمی اور تحقیقی تعاون کے لئے نئی راہیں تلاش کرنے کے باہمی عزم کے اعادہ کے ساتھ اختتام پذیر ہوئی۔\
Short Link: https://urdu.app.com.pk/urdu/?p=508164
