اسلام آباد۔7اگست (اے پی پی):وزیر مملکت برائے خزانہ بلال اظہر کیانی نے کہا ہے کہ پاکستان کے زرمبادلہ کے ذخائر 20 ارب ڈالر سے تجاوز کر گئے ہیں جو ملکی معیشت کے استحکام اور بہتر مالیاتی حکمت عملی کا مظہر ہے۔جمعرات کو ڈیجیٹل نیشنل سمٹ سے خطاب کرتے ہوئے انہوں نے کہا کہ اس وقت سٹیٹ بینک آف پاکستان کے پاس 15 ارب ڈالر جبکہ کمرشل بینکوں کے پاس 5.5 ارب ڈالر کے ذخائر موجود ہیں۔بلال اظہر کیانی نے کہا کہ موجودہ حکومت کی معاشی پالیسیوں کے باعث ملک میکرو اکنامک استحکام کی جانب گامزن ہے۔
انہوں نے بتایا کہ مہنگائی کی شرح اور پالیسی ریٹ میں کمی آئی ہے جس سے کاروباری اور سرمایہ کاری کے ماحول میں بہتری آئی ہے۔انہوں نے مزید کہا کہ حکومت کا اگلا ہدف پائیدار اور جامع اقتصادی ترقی ہے جس کے لیے برآمدات کو فروغ دینے، صنعتی پیداوار میں اضافہ کرنے اور ٹیرف اصلاحات جیسے اقدامات کیے جا رہے ہیں۔وزیر مملکت نے کہا کہ حکومت معیشت کی ڈیجیٹلائزیشن پر خصوصی توجہ دے رہی ہے تاکہ ٹیکنالوجی کے ذریعے شفافیت اور کارکردگی کو بہتر بنایا جا سکے۔
انہوں نے فیڈرل بورڈ آف ریونیو (ایف بی آر) میں جاری اصلاحات کا بھی ذکر کیا جن کا مقصد محصولات میں اضافہ اور ٹیکس نیٹ کو وسعت دینا ہے۔انہوں نے اس عزم کا اظہار کیا کہ حکومت مالی نظم و ضبط برقرار رکھتے ہوئے ملک کو ترقی، روزگار اور خوشحالی کی راہ پر گامزن کرے گی۔
