پاکستان کے صنعتی شعبے کو ڈیجیٹل معیشت میں تبدیل کرنے کے لیے چین کے اقتصادی ماڈل کو اپنانے کی ضرورت ہے، افتخار علی ملک

لاہور۔4جنوری (اے پی پی):سارک چیمبر آف کامرس اینڈ انڈسٹری کے سابق صدر افتخار علی ملک نے پاکستان کے صنعتی شعبے کو ڈیجیٹل معیشت میں تبدیل کرنے کے لیے چین کے اقتصادی ماڈل کو اپنانے پر زور دیا ہے۔

ہفتہ کو یہاں اپنے ایک بیان میں انہوں نے کہا کہ پاکستان کے فرسودہ صنعتی فریم ورک کو جدید بنانے، پیداواری صلاحیت کو بڑھانے اور اقتصادی لچک کو فروغ دینے کے لیے جرات مندانہ اصلاحات اور اسٹریٹجک شراکت داری کی ضرورت ہے۔

تکنیکی جدت طرازی، مضبوط بنیادی ڈھانچے کی ترقی اور صنعتی آٹومیشن کے لیے مراعات پر مبنی پالیسیوں پر توجہ مرکوز کرنا وقت کی ضرورت ہے۔ انہوں نے کہا کہ صنعتی صلاحیت کو بروئے کار لانے اور عالمی منڈی میں مقابلہ کرنے کے لیے چین کے ماڈل، خاص طور پر ڈیجیٹل تبدیلی کے اقدامات کو اپنانے کی ضرورت ہے۔