پاکستان کے نامور صداکار اور میزبان طارق عزیز کا یوم پیدائش (کل) منایا جائے گا

اسلام آباد۔27اپریل (اے پی پی):معروف کمپئر ، اداکار اور شاعر طارق عزیز کا یوم پیدائش کل(پیر 28 اپریل کو )منایا گیا ۔طارق عزیز جالندھر کے آرائیں خاندان میں میاں عبدالعزیز پاکستانی کے ہاں پیدا ہوئے، جنہوں نے قیام پاکستان سے گیارہ سال قبل اپنے نام کے ساتھ ’پاکستانی‘ لکھنا شروع کر دیا تھا۔

طارق عزیز نے ابتدائی تعلیم جالندھر میں حاصل کی اور قیام پاکستان کے بعد اپنے خاندان کے ساتھ ساہیوال منتقل ہوئے۔طارق عزیز نے ا پنی تعلیم ساہیوال سے ہی حاصل کی بعد ازاں انہوں نے ریڈیو پاکستان لاہور سے اپنی پیشہ ورانہ زندگی کا آغاز کیا۔1964ء میں جب پاکستان ٹیلی وژن کا قیام عمل میں آیا تو طارق عزیز پی ٹی وی کے سب سے پہلے مرد اناؤنسر تھے۔

1975ء میں شروع کیے جانے والے ان کے سٹیج شو نیلام گھر نے ان کو شہرت کی بلندیوں پر پہنچا دیا۔یہ پروگرام کئی سال تک جاری رہا اور اسے بعد میں بزمِ طارق عزیز شو کا نام دے دیا گیا۔طارق عزیز کو ان کی خدمات کے اعتراف میں تمغہ حسن کار کردگی سمیت متعدد ایوارڈز سے بھی نوازا گیا۔

طارق عزیز 17 جون 2020ء میں 84 سال کی عمر میں اس جہان فانی سے کوچ کر گئے۔ ان کی سالگرہ کے موقع پرعلمی و ادبی حلقوں اور شو بز انڈسٹری کی جانب سے مختلف تقریبات میں ان کو خراج عقیدت پیش کیا جائے گا۔

Short Link: https://urdu.app.com.pk/urdu/?p=588427