نئی دہلی۔14اگست (اے پی پی):پاکستان ہائی کمیشن نئی دہلی کے زیر اہتمام جمعرات کو پاکستان کی آزادی کی 78 ویں سالگرہ شایان شان طریقے سے منائی گئی۔ پاکستان ہائی کمیشن نئی دہلی سے جاری بیان کے مطابق بھارت میں پاکستان کے ناظم الامور سعد احمد وڑائچ نے ہائی کمیشن کے چانسری لان میں ایک پروقار تقریب کے دوران قومی پرچم لہرایا۔ تقریب میں ہائی کمیشن کے افسران، عملے اور ان کے اہل خانہ نے شرکت کی۔ اس موقع پر صدر پاکستان، وزیراعظم اور نائب وزیر اعظم و وزیر خارجہ کے پیغامات بھی پڑھ کر سنائے گئے۔
ناظم الامور سعد احمد وڑائچ نے اپنے خطاب میں آزادی کی عظیم جدوجہد کو زبردست خراج عقیدت پیش کرتے ہوئے کہا کہ قائداعظم محمد علی جناحٌ کی متحرک قیادت میں برصغیر کے مسلمانوں نے آزاد وطن کی تخلیق کے لئے تاریخ کا دھارا بدل کر رکھ دیا۔ انہوں نے کہا کہ پاکستان برصغیر کے مسلمانوں کے حق خودارادیت کی طویل اور عظیم جدوجہد کی تکمیل ہے۔ انہوں نے کہا کہ آزادی ایک عظیم نعمت اور خداوند کریم کا انمول تحفہ ہے جس کا ہمہ وقت دفاع ضروری ہے، آزادی کا راستہ شہداء کے خون سے ہموار ہوا ہے۔
سعد احمد وڑائچ نے کہا کہ معرکہ حق اس امر کی توثیق کرتا ہے کہ پاکستان اپنی خودمختاری اور سالمیت کے دفاع کی بھرپور صلاحیت رکھتا ہے اور کسی بھی بیرونی خطرے یا جارحیت کا موثر جواب دینے کی مکمل اہلیت رکھتا ہے۔ انہوں نے کہا کہ غلبے کے لئے چھیڑی گئی جنگ میں دشمن خود مغلوب ہوا۔ ناظم الامور نے کہا کہ گزشتہ 78 برسوں کے دوران پاکستان نے ترقی و خوشحالی کے سفر میں نمایاں پیشرفت کی ہے۔
انہوں نے مادر وطن کے تحٰفظ اور وقار کے لئے جانیں قربان کرنے والے قومی محافظوں کی عظیم قربانیوں کو خراج تحسین پیش کیا اور کہا کہ خطے میں امن کا ہدف باہمی اعتماد، مساوات اور جموں و کشمیر سمیت تمام تنازعات کے پرامن حل کی بنیاد پر ہی حاصل کیا جا سکتا ہے۔ انہوں نے کہا کہ سفارت کاری اور ڈائیلاگ پر مبنی طرز فکر جنوبی ایشیاء کے روشن مستقبل کا پیشہ خیمہ ثابت ہو سکتی ہے جبکہ تسلط اور بالادستی پر مبنی طرز عمل خطے کی خوشحالی اور ترقی کے امکانات کو بدستور محدود کرتے رہیں گے۔
تقریب میں روایتی لباس میں ملبوس بچوں نے تحریک آزادی کے مختلف پہلوئوں کی عکاسی کرتے ہوئے دل موہ لینے والی پرفارمنس پیش کی جبکہ ناظم الامور نے اپنی اہلیہ اور مشن کے دیگر افسران کے ہمراہ جشن آزادی کا خصوصی کیک بھی کاٹا۔
