لاہور۔10مئی (اے پی پی):وزیر اطلاعات پنجاب عظمی بخاری نے کہا ہے کہ پاک افواج نے چند گھنٹوں میں بھارتی فوج کو ایکسپوز کردیا، ”بنیان مرصوص” دنیا کی تاریخ کا کامیاب ترین آپریشن ہے، بھارت نے پاکستان کے صبر کو کمزوری سمجھا تھا۔ہفتہ کے روز افواج پاکستان کو خراج تحسین پیش کرتے ہوئے انہوں نے کہا کہ آپریشن” بنیان مرصوص” دنیا کی تاریخ کا کامیاب ترین آپریشن ہے، بھارت کو حملے کا جواب دے کرپاکستان کی فوج نے دنیا کی بہترین اور پروفیشنل فوج ہونے کا ثبوت دیا ہے،
پاک افواج کے کارنامے تاریخ میں سنہری حروف میں لکھے جائیں گے۔ عظمی بخاری نے کہا کہ بھارت نے پاکستان کے صبر کو کمزوری سمجھا تھا، پچھلے چار سے پانچ دن بھارت جھوٹ اور پراپیگنڈے کے ساتھ جارحیت کر رہا تھا،پاکستانی فوج کے 4 گھنٹے بھارت کو جواب دینے کے لیے کافی تھے،پاکستان نے دن کے اجالے میں بھارت کو جواب دیا ہے۔ انہوں نے کہا کہ پاکستان ایک ذمہ دار ملک ہے، الحمدللہ پاکستان کے تمام طیارے محفوظ ہیں،
افواج پاکستان نے چند گھنٹوں میں بھارتی فوج کو ایکسپوز کردیا ہے۔ وزیر اطلاعات پنجاب نے کہا کہ پاکستان کا میڈیا بھی خراج تحسین کا مستحق ہے جس نے بھارتی میڈیا کو صحافتی قواعد و ضوابط سکھائے، مودی کا جنگی جنون اس کے گلے پڑ گیاجو بھارتی میڈیا پانچ دن سے جھوٹ بول رہا تھا آج وہی میڈیا پاکستان کی برتری تسلیم کررہا ہے۔
Short Link: https://urdu.app.com.pk/urdu/?p=595324
