کراچی۔1ستمبر (اے پی پی):پاک بحریہ کاملک بھر کے سیلاب زدہ علاقوں میں ریلیف اینڈ ریسکیو آپریشن جاری ہے ۔جاری اعلامیہ کے مطابق پاک بحریہ کے جوان سندھ کے مختلف علاقوں بشمول سانگھڑ، تحصیل مہر، سلطان کوٹ، شاہ بندر، کوڈاریو، دولت پور، چوھڑجمالی، سجاول اور ٹھٹھہ میں امدادی کاروائیوں میں حصہ لے رہے ہیں۔
پاک بحریہ نے سندھ کے ساتھ ساتھ امدادی کاروائیوں کا دائرہ کار پنجاب اور خیبر پختونخواہ کے سیلاب زدہ علاقوں تک بھی بڑھا دیاہے۔ پاک بحریہ کے جوان کشتیوں اور ہیلی کاپٹرز کے ذریعے سیلاب زدہ علاقوں میں پھنسے افراد کو محفوظ مقامات پر منتقل کر رہے ہیں۔پاک بحریہ کی جانب سے متاثرین میں راشن بیگ، تیار کھانا، صاف پانی اور دیگر ضروریات زندگی تقسیم کی جارہی ہیں۔
پاک بحریہ کی طرف سے راجن پور، سانگھٹر اور ڈی آئی خان میں میڈیکل کیمپس کے علاوہ مختلف علاقوں میں موبائل میڈیکل ٹیمز بھی کام کر رہی ہیں۔ پاک بحریہ کے جوانوں نے ڈیرہ اسماعیل خان میں چشمہ روڈ کی عارضی مرمت کے بعد اسے عام ٹریفک کیلئے کھول دیا ہے۔
