اسلام آباد ۔ 3 ستمبر (اے پی پی) پاک بحریہ کے لیے بنائے جانے والے دوسرے 2300 ٹن وزنی جنگی جہاز (کارویٹ) کی رومانیہ میں منگل کو لانچنگ ہوئی، تقریب کے مہمان خصوصی پاک بحریہ کے چیف آف سٹاف ( پرسنل) وائس ایڈمرل اطہر مختار تھے۔ ترجمان پاک بحریہ کے مطابق کارویٹ جدید ٹیکنالوجی سے آراستہ درمیانے سائز اور وزن کے جہاز ہیں جو سکیورٹی پٹرول سمیت مختلف آپریشنز کیلئے استعمال ہوتے ہیں۔ وائس ایڈمرل اطہر مختار نے کہا کہ ان جہازوں کی شمولیت سے پاک بحریہ کے ملکی بحری سرحدوں کے دفاع اور جنگی صلاحیتوں میں مزید اضافہ ہوگا۔ مہمان خصوصی نے جہازوں کی تیاری میں ڈامن شپ یارڈ (رومانیہ) کے تعاون اور پیشہ ورانہ صلاحیتوں کی تعریف کی۔
