اسلام آباد ۔ 7 فروری (اے پی پی) پاک بحریہ کے زیر اہتمام امن مشق 2019 (آج) جمعہ سے شروع ہو گی، مشق میں 40سے زائد ممالک اپنے بحری جہازوں اور مندوبین کے ساتھ شرکت کر رہے ہیں ، یہ مشق دو اہم مراحل پر مشتمل ہے ، جس میں ہاربر فیز اور سی فیز شامل ہیں۔ہاربر فیز کے دوران مختلف سیمینارز، مباحثے اور عملی مظاہروں پر مشتمل ہے۔علاوہ ازیں عالمی سیاست کے تغیروتبدل ، بحیرہ ہند میںابھرنے والی نئی میری ٹائم جہتوں پر غورو فکرکے موضوع پر تین روزہ بین الالقوامی میری ٹائم کانفرنس کا انعقادکیا گیا ۔جمعرات کو یہاں کمانڈر پاکستان فلیٹ وائس ایڈمرل امجد خان نیازی نے کثیرالقومی بحری مشق امن 2019 کے کے حوالے سے میڈیا کو بریفنگ دیتے ہوئے بتایا کہ ماضی قریب میں پاکستان بہت مشکل ادوار سے گزرا ہے، مگر ہم دہشت گردی اور خوف و ہراس پھیلانے والی قوتوں کے خلاف مستعد کھڑے رہے۔متعدد نقصانات اور قربانیوں کے باوجود ، پاکستان ایک ذمہ دار ریاست کے طور پر سامنے آیا ہے جسے اقوام عالم میں اپنے کردار اور اہمیت کا مکمل احساس ہے۔ کسی بھی بحری قوم کی طرح پاکستان کے بھی میری ٹائم سیکٹر میں قابل قدرمفادات ہیں۔محفوظ اور جرائم سے پاک سمندری راستے تجارت کے لئے سمندری راستوں پر انحصار ،سی پیک کے آغاز اور پاکستان کا توانائی کے اہم راستوں پر موجود ہونے کے لئے ناگزیرہیں۔ انہوں نے بتایا کہ مجموعی طور پر، ان تمام حقیقتوں کے پیش نظر بحری استحکام ہمارے قومی تحفظ کے نقطہ اول کی حیثیت کا حامل ہے۔پاکستان یہ سمجھتا ہے کہ بحری امن و استحکام صرف پاکستان کے لیے ہی ضروری نہیں بلکہ ان تمام ممالک کے لیے بھی ناگزیر ہے جن کی ترقی سمندری تجارت سے جڑی ہے ۔ انہوں ے کہا کہ مشترکہ آپریشنز کی ، تو ہمیں دوران آپریشنز کھلے سمندروں میں درپیش خطرات کو بھی ذہن میں رکھنا چاہیے، جس میں بحری دہشت گردی، قزاقی اور موسم کی تبدیلی شامل ہیں،سمندروں کی وسعت کو ہم دوہری پیچیدگی کی طور پر لیتے ہیں یعنی سمندر صرف دنیا کی تجارت کو ہی متحرک نہیں کرتا بلکہ مخالف قوتوں کو بھی بحری امن و استحکام خراب کرنے کے بہت سے مواقع فراہم کرتا ہے۔دوہری پیچیدگی کا رجحان اس مفروضے کو تقویت دیتا ہے کہ متشدد غیر ریاستی عناصر سے کوئی ملک تنہا نبرد آزما ہو نہیں سکتا۔سمندروں کو ہم سب کے لیے محفوظ بنانے کے لیے اجتماعی کوششوں کی ضرورت ہے، امن مشق بحری خطرات سے متحد ہو کر نمٹنے کی مسلمہ حقیقت کا مظہر ہے ۔ کمانڈر پاکستان فلیٹ نے کہا کہ مشق کا بنیادی مقصد ایک دوسرے کے بحری نظریات اور کام کرنے کے طریقہ کار کو سمجھنا اور سمندر میں درپیش مشترکہ خطرات سے نمٹنے کی حکمت عملی بنانا ہے۔ یہ مشق شریک ممالک کے دوستانہ تعلقات میں معاون ہوگی جس سے مشترکہ حکمت عملی ترتیب دینے اور یکساں طریقہ کار کی مشق کرنے سے ان بحری خطرات سے نبرد آزما ہونے کا راستہ متعین ہوگا جس سے ہم سب اثر انداز ہو رہے ہیں ، اجتماعی طور پر امن مشق مشترکہ مقاصد کے حصول کی کوششوں کے لیے موجودہ خلاءکو پر کرتی ہے۔ ایڈمرل نیازی نے اس بات پر زور دیتے ہوئے کہاکہ میڈیا پاک بحریہ کی اس کوشش کا درست تاثر اور امن مشق کے مقاصد کو نمایاں کرنے میں اپنا کردار ادا کرے گا۔اس تمام تر کاوش کا مقصد یہ ہے کہ سمندروں کو محفوظ بنایا جائے تاکہ تمام مثبت بحری سرگرمیاں کسی خوف و خطرے کے بغیر جاری رہ سکیں۔ امن مشق ایسا ماحول پیدا کرتی ہے جس میں متعدد ممالک کی بحری افواج ایک عزم کے ساتھ مل کر کام کریں اور وہ عزم ہے ©،” امن کے لیے متحد ” ‘
Short Link: https://urdu.app.com.pk/urdu/?p=133412
