اسلام آباد ۔ 20ستمبر (اے پی پی) پاک بحریہ کے سربراہ ایڈمرل ظفر محمود عباسی نے امریکہ میں منعقدہ 23 ویں عالمی سی پاور سمپوزیم میں شرکت کی۔ ترجمان پاک بحریہ کی طرف سے جمعرات کو یہاں جاری بیان کے مطابق سمپوزیم کے انعقادکا مقصد مشترکہ میری ٹائم چیلنجز سے نمٹنے کے لیے عالمی بحری اقوام کو ایک پلیٹ فارم مہیا کرنا ہے۔ترجمان پاک بحریہ نے بتایاکہ سمپوزیم میں150ممالک کے وفود سمیت 80 ممالک کی بحری افوج کے سربراہان نے شرکت کر رہے ہیں۔انہوں نے کہاکہ پاک بحریہ کے سربراہ ایڈمرل ظفر محمود عباسی نے امریکی حکام سمیت ترکی اور برازیل کی بحری افواج کے سربراہان سے خصوصی ملاقاتیں کیں۔ملاقاتوں کے دوران بحرِ ہند کی سکیورٹی اور مختلف شعبوں میں باہمی تعاون کے امور پر تبادلہ خیال کیا گیا۔
