اسلام آباد ۔ 12 مارچ (اے پی پی) پاک فضائیہ نے کثیر المقاصد لڑاکا طیارے جے ایف 17تھنڈر کے ذریعے طویل فاصلے تک مار کرنے والے ملکی ساختہ میزائل کا کامیاب تجربہ کیا ہے۔ یہ تجربہ ملکی دفاع میں ایک عظیم سنگِ میل کی حیثیت کاحامل اور قابلِ فخر پاکستانی سائنسدانوں اور انجیئنیرز کی صلاحیتوں کا منہ بولتا ثبوت ہے جنہوں نے جے ایف 17تھنڈر کو ملکی سطح پر تیار کردہ اس جدید میزائل سے لیس کر دیا ہے۔ اس کامیاب تجربے سے جے ایف 17تھنڈر کو دن اور رات میں طویل فاصلے کے اہداف کو ٹھیک ٹھیک نشانہ بنانے کی صلاحیت حاصل ہو گئی ہے۔ پاک فضائیہ کے سربراہ ائیر چیف مارشل مجاہد انور خان نے پاکستانی سائنسدانو ں اور انجینئرز کی کاوشوں کو سراہتے ہوئے پاک فضائیہ کو اس عظیم کامیابی پر مبارکباد پیش کی ہے۔انہوں نے کہا کہ پاکستان ایک امن پسند ملک ہے لیکن اگر دشمن نے ہم پر جارحیت مسلط کی تو ہم اس کا بھر پور جواب دیں گے۔
