اسلام آباد ۔ 8 نومبر (اے پی پی)پاک فضائیہ کے جے ایف 17 تھنڈر نے ژوہائی ائیر شو کے تیسرے روز مختلف ممالک کی ایئر فورسز اور فضائی صنعت کے وفود کی موجودگی میں شاندار مظاہرہ پیش کیا،فضائی مظاہرہ کے ماہر ونگ کمانڈر ذیشان بریار نے کچھ غیر معمولی کرتب دکھائے جن میں سلو سپیڈ پاس ،میوزیکل کلمب ،انورٹیڈ فلائیٹ ،تھندر ٹرن شامل تھے ۔ پاک فضائیہ کے ترجمان کے مطابق ‘ فخر قوم’ جے ایف 17تھنڈر پندرہ منٹ تک دلکش کارکردگی دکھا کر سینکڑوں تماشائیوں کی تالیوں کی گونج میں اپنا مشہور زمانہ الوداعی مظاہرہ ورٹیکل رول کر تے ہوئے ژوہائی کی فضاو¿ں میں اوجھل ہو گیا۔ مظاہرے کے بعد جب طیارہ واپس آیا تو متحیر شائقین نے تالیاں بجا کراسکی شاندار پرفارمنس پر داد دی ۔ فضائی مظاہرے میں حصہ لینے والے طیارے کے علاوہ ایک جے ایس 17 طیارہ تمام ہتھیاروں سے لیس، زمین پر موجود شائقین، مختلف ممالک سے آئے خریداروں اور فضائی صنعت کے ماہرین کے لئے مرکز نگاہ بنا رہا۔ پاک فضائیہ کا دستہ 6سے 11نومبر 2018تک ژوہائی چائنہ میں منعقدہ12ویں چائنہ انٹر نیشنل ایویشن اینڈ ایروسپیش ایگزبیشن میں شریک ہے۔ پاکستان ائیروناٹیکل کمپلےکس اور چین کی مشترکہ کاوش سے تیار کردہ JF-17تھنڈرطیارہ اپنے ہم عصر جنگی جہازوں میں اپنی جدید ساخت اور ہمہ جہت خوبیوں کی وجہ سے ایک نمایاں حیثیت کا حامل ہے۔
Short Link: https://urdu.app.com.pk/urdu/?p=121112
